सेवानिवृत्त पोलीस निरीक्षकाच्या घरात चोरी; २.४० लाखांचा ऐवज लंपास

सेवानिवृत्त पोलीस निरीक्षकाच्या घरात चोरी; २.४० लाखांचा ऐवज लंपास

कुटुंब गावाला गेल्याचा फायदा; विठ्ठलवाडीत घरफोडीची घटना

जळगाव : प्रतिनिधी कुटुंबियांसह गावी गेलेल्या सेवानिवृत्त पोलीस निरीक्षकांच्या घरात चोरट्यांनी डल्ला मारत रोकड व दागिन्यांसह सुमारे २ लाख ४० हजार रुपयांचा ऐवज लंपास केल्याची घटना उघडकीस आली आहे. शहरातील विठ्ठलवाडी, निमखेडी रोड परिसरात ही घरफोडी घडली असून, याप्रकरणी तालुका पोलिस ठाण्यात अज्ञात चोरट्यांविरुद्ध गुन्हा दाखल करण्यात आला आहे.

घर बंद असल्याची संधी साधून चोरी
मगन धनाजी मोहीते (वय ६२) हे पोलीस निरीक्षक पदावरून सेवानिवृत्त झाले असून, धुळे जिल्ह्यातील मूळ गावी शेती असल्याने ते दि. २२ मार्च रोजी पत्नीसह गावी गेले होते. या दरम्यान चोरट्यांनी घराचा कडीकोयंडा तोडून आत प्रवेश केला. घरातील साहित्य अस्ताव्यस्त करत कपाटातून ७३ हजार रुपये रोख, ११ ग्रॅम सोन्याचे तुकडे, १ तोळ्याची सोन्याची चैन तसेच ७ भार चांदीचे पैंजण असा एकूण २ लाख ४० हजार ५०० रुपयांचा ऐवज चोरून नेला.

शेजाऱ्यांच्या सतर्कतेमुळे प्रकार उघड
घराचा दरवाजा उघडा असल्याचे लक्षात आल्याने शेजारी राहणाऱ्या महिलेने मोहीते कुटुंबीयांशी संपर्क साधला. त्यानंतर ते तातडीने परत आल्यानंतर घरफोडी झाल्याचे निदर्शनास आले.
‘पोलीसांचे घरही सुरक्षित नाही’
या घटनेमुळे शहरातील सुरक्षेचा प्रश्न पुन्हा ऐरणीवर आला असून, ‘पोलीसांचे घरच सुरक्षित नसेल तर सामान्य नागरिकांचे काय?’ असा सवाल नागरिकांमधून उपस्थित होत आहे. पोलिसांकडून पुढील तपास सुरू आहे.