सोनवणे-ठाकरे गटाचा पोलीस ठाण्यातच राडा

सोनवणे-ठाकरे गटाचा पोलीस ठाण्यातच राडा

पोलीस स्टेशन बनले आखाडा; पाच जण जखमी
जळगाव: शहरातील प्रभाग क्रमांक ३ मध्ये गटारी कामाच्या टेंडरवरून भाजपचे माजी नगरसेवक कैलास सोनवणे आणि शिवसेना शिंदे गटाचे कार्यकर्ते राहुल उर्फ मोगली ठाकरे यांच्या कुटुंबीयांमध्ये शनिवार (दि. १४ मार्च) दुपारी रिधूरवाड्यात जोरदार वाद व हाणामारी झाली. दोन्ही गटांकडून शस्त्रांचा वापर झाल्याची माहिती पोलिसांनी दिली.

हाणामारीत पाच जण जखमी झाले असून, कैलास सोनवणे आणि त्यांच्या पुतण्यावर हल्ला करण्यात आला. दोन्ही गट पोलीस ठाण्यात तक्रार देण्यासाठी आले असता, ठिकाणी तणावाचे वातावरण निर्माण झाले. पोलिसांनी सौम्य लाठीचार्ज करून परिस्थिती नियंत्रणात आणली.

महानगर पालिका निवडणुकीत प्रभाग क्रमांक ३ मधून कैलास सोनवणे यांच्या मुली प्रतिक्षा सोनवणे आणि ठाकरे गटाच्या कार्यकर्त्यांची पत्नी चैताली ठाकरे यांच्यातील निवडणूक सुरू होती. अतिशय किरकोळ मतांनी चैताली ठाकरे पराभूत झाल्यानंतर दोन्ही गटांमध्ये धूसफूस सुरु होती.

टेंडरच्या वादातून दोन्ही गटात वाद वाढला. माजी नगरसेवक कैलास सोनवणे समर्थकांसह ठाकरे कुटुंबाच्या घराजवळ गेले, मात्र राहूल ठाकरे तेथे नव्हते. दोन्ही गटांनी पोलीस ठाण्यात तक्रार दाखल केली असता, तिथेच दोन्ही गट भिडले.

दुपारी सुमारे ४ वाजता ठाकरे गटातील काही जण कैलास सोनवणे यांच्या घराजवळ आले. दोन्ही गट समोरासमोर आल्यामुळे तलवारी व लाकडी दांडक्यांने मारहाण झाली. जखमींमध्ये:
शैलेश ठाकरे (५५, रा. पक्कीचाळ, वाल्मिक नगर)विशाल प्रल्हाद सोनवणे (३०, रा. रिधूरवाडा)हितेश डिगंबर ठाकरे (२८)
दोन्ही गटातील सुमारे १० ते १२ जण पोलिसांनी ताब्यात घेतले आहेत.

घटनेची माहिती मिळताच पोलीस अधीक्षक डॉ. महेश्वर रेड्डी, उपविभागीय पोलीस अधिकारी नितीन गणापुरे, स्थानिक गुन्हे शाखेचे पोलीस निरीक्षक राहूल गायकवाड, शहर पोलीस ठाण्याचे पो.नि. सागर शिंपी यांच्यासह क्यूआरटी पथक घटनास्थळी दाखल झाले. पोलीसांनी दोन्ही गटांविरुद्ध कठोर कारवाई करण्याचे आदेश दिले.
सौम्य लाठीचार्ज करून पोलीसांनी दोन्ही गटांना बाहेर काढले आणि तणाव नियंत्रणात आणला.