स्थायी व महिला-बालकल्याण समिती सभापतीपद बिनविरोध

स्थायी व महिला-बालकल्याण समिती सभापतीपद बिनविरोध

प्रत्येकी एकच अर्ज; डॉ. चंद्रशेखर पाटील व सिंधुताई कोल्हे यांची निवड निश्चित

जळगाव प्रतिनिधी : जळगाव शहर महानगरपालिकेच्या अत्यंत महत्त्वाच्या मानल्या जाणाऱ्या स्थायी समिती आणि महिला व बालकल्याण समिती सभापतीपदासाठी गुरुवारी (दि. २६ फेब्रुवारी) अर्ज दाखल करण्यात आले. दोन्ही पदांसाठी प्रत्येकी एकच अर्ज प्राप्त झाल्याने निवडणूक प्रक्रिया आता केवळ औपचारिकता उरली असून संबंधित उमेदवार बिनविरोध निवडून येणार हे स्पष्ट झाले आहे.

स्थायी समिती सभापतीपदासाठी  भाजपतर्फे डॉ. चंद्रशेखर शिवाजी पाटील यांचा एकमेव अर्ज सादर करण्यात आला. तर महिला व बालकल्याण समिती सभापतीपदासाठी  शिवसेना तर्फे ज्येष्ठ नगरसेविका सिंधुताई विजय कोल्हे यांनी उमेदवारी अर्ज दाखल केला. दोन्ही उमेदवारांनी आपले अर्ज नगरसचिव सतीश शुक्ला यांच्याकडे सुपूर्द केले.

अर्ज दाखल करण्याच्या प्रक्रियेदरम्यान महापालिकेत उत्साहाचे वातावरण होते. भाजपचे गटनेते प्रकाश बालानी, उपगटनेते नितीन बरडे, स्थायी समिती सदस्य दीपक सूर्यवंशी, विशाल भोळे, सुरेश सोनवणे, अरविंद देशमुख, कल्पेश सोनवणे, मानसी भोईटे, वंदना इंगळे, नितीन सपके तसेच महिला व बालकल्याण समिती सदस्य सुरेखा तायडे, रंजना वानखेडे, पूजा जगताप, विद्या सोनवणे, गायत्री राणे उपस्थित होते. शिवसेनेतर्फे जिल्हाप्रमुख विष्णू भंगाळे, दिलीप पोकळे, नरेंद्र पाटील, गणेश सोनवणे, समिती सदस्य प्रतिभा देशमुख, डॉ. अमृता सोनवणे यांच्यासह नगरसेवक प्रवीण कोल्हे व पियुष कोल्हे  आदींची उपस्थिती होती.

स्थायी समितीवर डॉ. चंद्रशेखर पाटील यांची वर्णी लागल्याने भाजप कार्यकर्त्यांमध्ये समाधानाचे वातावरण आहे. तर महिला व बालकल्याण समितीचे नेतृत्व अनुभवी सिंधुताई कोल्हे यांच्याकडे जात असल्याने शिवसेनेच्या महिला आघाडीत उत्साहाचे वातावरण दिसून येत आहे. आता अधिकृत घोषणेची प्रतीक्षा असून दोन्ही समित्यांच्या कामकाजाकडे महापालिकेतील राजकीय वर्तुळाचे लक्ष लागले आहे.