स्वीकृत नगरसेवकांवरून आयुक्त दालनात खल

स्वीकृत नगरसेवकांवरून आयुक्त दालनात खल

पक्षीय बलाबलनुसारच वाटप होणार; महायुतीचा सातही जागांवर दावा फेटाळला

जळगाव : स्वीकृत नगरसेवकांच्या निवडीसंदर्भात सोमवारी दुपारी महापालिका आयुक्तांच्या दालनात चारही गटनेत्यांची महत्त्वपूर्ण बैठक पार पडली. या बैठकीत स्वीकृत सदस्य निवडीसाठीचा नियम, पक्षीय बलाबल आणि गणिती सूत्रांवर सविस्तर चर्चा झाली. यावेळी महापालिका आयुक्त ज्ञानेश्वर ढेरे यांनी पक्षनिहाय संख्याबळानुसार भाजपचे ४, शिवसेना (शिंदे गट)चे २ आणि शिवसेना (ठाकरे गट)चा १ सदस्य अशा पद्धतीने सात स्वीकृत नगरसेवकांची निवड होऊ शकते, अशी स्पष्ट भूमिका मांडली.

जळगाव महापालिकेच्या निवडणुकीत भाजपचे ४६ नगरसेवक विजयी झाले असून शिवसेना शिंदे गटाचे २२ व एक अपक्ष असे एकूण २३ सदस्य निवडून आले आहेत. तर राष्ट्रवादी काँग्रेसचा १ आणि शिवसेना ठाकरे गटाचे ५ नगरसेवक निवडून आले आहेत. एकूण ७५ सदस्यसंख्येच्या सभागृहात ७ स्वीकृत सदस्यांची निवड करावयाची आहे. त्यानुसार ७५ भागिले ७ या सूत्रानुसार १०.७१ हा गुणोत्तरांक निश्चित होत असून त्यानुसार भाजपला ४.२९, शिंदे गटाला २.१४ आणि ठाकरे गटाला ०.४६ असा अपुर्णांक येतो. त्यामुळे पूर्णांकाच्या आधारे भाजप ४, शिंदे गट २ आणि ठाकरे गट १ अशी विभागणी ग्राह्य धरली जाणार असल्याचे आयुक्तांनी स्पष्ट केले.
दरम्यान, भाजप-शिंदेसेना-राष्ट्रवादी काँग्रेस या महायुतीने एकत्र निवडणूक लढवली असल्याचा दावा करीत सर्व सात स्वीकृत सदस्य महायुतीचेच व्हावेत, अशी मागणी बैठकीत करण्यात आली.

आम्ही एकत्रित ७० नगरसेवकांसह बहुमत मिळवले असल्याने सातही जागांवर आमचा हक्क असल्याचे गटनेत्यांनी सांगितले. मात्र निवडणुकीनंतर विभागीय आयुक्तांकडे गटनोंदणी करताना तीन वेगवेगळ्या गटांची नोंदणी करण्यात आल्याने एकत्रित बेरीज ग्राह्य धरता येणार नाही, असे प्रशासनाने स्पष्ट केले. त्यामुळे गटनोंदणीप्रमाणेच वाटप केले जाईल, अशी भूमिका आयुक्तांनी घेतली.

यापूर्वी स्थायी समिती आणि महिला बालकल्याण समितीच्या निवडीवेळीही याच पक्षीय बलाबलाचा आधार घेण्यात आला होता. त्या वेळी ठाकरे गटाला प्रत्येकी एक सदस्यपद देण्यात आले होते. त्याच धर्तीवर स्वीकृत सदस्यांची निवड होणार असल्याचे संकेत बैठकीत मिळाले.

दि. १७ पर्यंत सर्व गटनेत्यांनी स्वीकृत सदस्यांच्या नावांचे प्रस्ताव आयुक्तांकडे सादर करावयाचे आहेत. त्यानंतर दि. २३ रोजी छाननी होऊन पुन्हा गटनेत्यांची बैठक होणार आहे. त्याच दिवशी विशेष महासभा बोलावण्याबाबतही निर्णय घेतला जाणार असल्याची माहिती प्रशासनाकडून देण्यात आली. त्यामुळे स्वीकृत नगरसेवकांच्या निवडीवरून राजकीय वातावरण आणखी तापण्याची चिन्हे दिसत आहेत.