हत्यार विक्री सिंडिकेटचा पर्दाफाश; फरार आरोपीसह दोघ जेरबंद

हत्यार विक्री सिंडिकेटचा पर्दाफाश; फरार आरोपीसह दोघ जेरबंद

गावठी कट्टा व सात तलवारी जप्त; खून प्रकरणातील फरार आरोपीचा सहभाग उघड

जळगाव (प्रतिनिधी) प्राणघातक हल्ल्याच्या गुन्ह्यातील संशयित असलेले दोघ जण नाशिक कारागृहात एकत्र असताना त्यांची ओळख मैत्रीत बदलली आणि बाहेर आल्यानंतर त्यांनी गावठी कट्टा व तलवारी विक्रीचे सिंडिकेट उभे करण्याचा डाव आखला. मात्र, याआधीच जिल्हापेठ पोलिसांनी कारवाई करत या सिंडिकेटचा पर्दाफाश केला. या कारवाईत गावठी कट्टा व सात तलवारी जप्त करण्यात आल्या असून, अटक केलेल्यांपैकी एक जण खून प्रकरणातील फरार आरोपी असल्याची माहिती पोलीस अधीक्षक डॉ. महेश्वर रेड्डी यांनी पत्रकार परिषदेत दिली.
संशयित हालचालीतून अटक
जिल्हापेठ पोलीस ठाण्याचे गुन्हे शोध पथक पेट्रोलिंग करत असताना आर.आर. शाळेजवळील गल्लीत दोन तरुण संशयास्पद हालचाली करताना आढळले. पोलिसांनी त्यांना ताब्यात घेऊन चौकशी केली असता धनंजय उर्फ धीरज दत्तू कोळी (वय २०, रा. पाळधी, ता. धरणगाव) व अजय मारुती डोळे (वय २३, रा. नेरी दिगर, ता. जामनेर) अशी त्यांची ओळख पटली.
झडतीत शस्त्रसाठा उघड
संशयितांच्या दुचाकीची झडती घेतली असता पोत्यात बांधलेली तलवार आणि पेट्रोल टाकीखाली इंजिनजवळ लपवून ठेवलेला गावठी कट्टा आढळून आला. याप्रकरणी दोघांविरुद्ध गुन्हा दाखल करण्यात आला.
एकमेकांवर हल्ल्यासाठी ठेवले होते हत्यार
तपासात उघड झाले की, धनंजय उर्फ धीरज कोळी हा पिंप्राळा येथे घडलेल्या खून प्रकरणातील फरार आरोपी आहे. तो गेल्या महिनाभरापासून पोलिसांना चकवा देत होता. दरम्यान, याच्याविरोधात असलेल्या दुसऱ्या गटातील व्यक्तींकडूनही गावठी कट्टा जप्त करण्यात आला होता. दोन्ही गटांमध्ये जुने वैमनस्य असून एकमेकांवर हल्ला करण्यासाठीच ते कट्टे बाळगत असल्याचे समोर आले आहे.
तलवारी विक्रीपूर्वीच पोलिसांचा सापळा
चौकशीत आरोपी अजय डोळे याने कट्टा धीरज कोळी याला विक्री केल्याची कबुली दिली. पुढील तपासात दोघांनी राजस्थान येथून तलवारी आणून विक्रीसाठी साठा केल्याचे उघड झाले. हत्यार विक्रीचे जाळे उभे करण्याआधीच पोलिसांनी दोघांना अटक केली.
सराईत गुन्हेगारांचा पर्दाफाश
दोन्ही आरोपी हे पोलिसांच्या रेकॉर्डवरील सराईत गुन्हेगार असून त्यांच्यावर यापूर्वीही अनेक गंभीर गुन्हे दाखल असल्याची माहिती समोर आली आहे.
पथकाची कारवाई
ही कारवाई पोलीस अधीक्षक डॉ. महेश्वर रेड्डी, अपर पोलीस अधीक्षक अशोक नखाते व उपविभागीय पोलीस अधिकारी नितीन गणापुरे यांच्या मार्गदर्शनाखाली पार पडली. जिल्हापेठ पोलीस ठाण्याचे प्रभारी अधिकारी अनिल वाघ यांच्या नेतृत्वाखाली उपनिरीक्षक गोपाल देशमुख, पोहेकॉ मिलिंद सोनवणे, महेश महाजन, तुषार पाटील, गोविंद साबळे, विशाल साळुंखे, समाधान पाटील, राहुल पाटील, नरेंद्र दिवेकर, ईश्वर खवडे, जयेश मोरे आणि साहेबराव खैरन यांनी ही कारवाई यशस्वीरीत्या पार पाडली.