हवामान अनुकूल शेतीसाठी ‘डिजिटल शेतीशाळा २०२६’; एप्रिल महिन्यात विशेष मार्गदर्शन सत्रे

हवामान अनुकूल शेतीसाठी ‘डिजिटल शेतीशाळा २०२६’; एप्रिल महिन्यात विशेष मार्गदर्शन सत्रे
जळगाव : नानाजी देशमुख कृषि संजीवनी प्रकल्प (पोकरा) अंतर्गत शेतकऱ्यांना हवामान बदलाला अनुरूप शेती तंत्रज्ञानाची माहिती देण्यासाठी एप्रिल २०२६ महिन्यात ‘डिजिटल शेतीशाळा २०२६’ या उपक्रमाचे आयोजन करण्यात आले आहे. पाणी फाऊंडेशनच्या सहकार्याने राबविण्यात येणाऱ्या या उपक्रमातून शेतकऱ्यांना आधुनिक व शाश्वत शेती तंत्रज्ञानाचे मार्गदर्शन केले जाणार आहे.

ऑनलाइन सत्रांद्वारे तज्ञांचे मार्गदर्शन; युट्यूबवर थेट प्रक्षेपण
या डिजिटल शेतीशाळेत कृषी तज्ञांकडून पिक व्यवस्थापन, हवामान अनुकूल तंत्रज्ञान, निविष्ठा उत्पादन तसेच एकात्मिक कीड व्यवस्थापन यावर मार्गदर्शन केले जाईल. दर आठवड्याला सायंकाळी ७.३० वाजता ऑनलाइन सत्रे आयोजित केली जाणार असून युट्यूबद्वारे त्याचे थेट प्रक्षेपण होणार आहे.

पेरणीपूर्व नियोजन ते भात लागवड तंत्रज्ञानावर सत्रे
या उपक्रमांतर्गत १ एप्रिल रोजी पेरणीपूर्व नियोजन, ८ एप्रिल रोजी निविष्ठा व जैविक उत्पादन, १५ एप्रिल रोजी एकात्मिक कीड व्यवस्थापन आणि २२ एप्रिल रोजी भात शेतीचे लागवड तंत्रज्ञान या विषयांवर तज्ञांचे मार्गदर्शन मिळणार आहे.

शेतकऱ्यांनी मोठ्या संख्येने सहभागी होण्याचे आवाहन
जिल्ह्यातील शेतकरी गट, कृषी ताई, एफपीओ तसेच महिला बचत गटांनी या उपक्रमात सहभागी व्हावे, असे आवाहन कृषी विभागाने केले आहे. अधिक माहितीसाठी संबंधित गावातील सहाय्यक कृषी अधिकाऱ्यांशी संपर्क साधण्याचेही सूचित करण्यात आले आहे.