हातगाड्यांवर घरगुती गॅसचा वापर; कारवाईसाठी पथके तरीही एकही कारवाई नाही

हातगाड्यांवर घरगुती गॅसचा वापर; कारवाईसाठी पथके तरीही एकही कारवाई नाही

गॅस तुटवड्याच्या पार्श्वभूमीवर काळाबाजाराबाबत नागरिकांत नाराजी

जळगाव : शहरात घरगुती गॅस सिलिंडरच्या संभाव्य तुटवड्याच्या चर्चा सुरू असतानाच हातगाड्यांवर खाद्यपदार्थ विक्रीसाठी घरगुती गॅस सिलिंडरचा सर्रास वापर होत असल्याचे वास्तव समोर आले आहे. गॅसचा काळाबाजार रोखण्यासाठी प्रशासनाने गॅस कंपन्या, पुरवठा विभाग आणि पोलिसांचा समावेश असलेली पथके नेमल्याचे जाहीर केले असले, तरी गेल्या दोन दिवसांत एकही कारवाई झालेली नसल्याचे चित्र आहे.
भजे गल्ली, जुने व नवीन बसस्थानक परिसर, गोलाणी मार्केट तसेच मू. जे. महाविद्यालय परिसरात अनेक हातगाड्यांवर घरगुती सिलिंडरचा वापर करून खाद्यपदार्थ विक्री होत असल्याचे पाहणीत दिसून आले. दरम्यान, पॅनिक बुकिंगमुळे सलग दुसऱ्या दिवशीही टेलिफोनिक बुकिंग बंद असल्याने नागरिकांमध्ये नाराजी व्यक्त होत आहे.
प्रशासनाने गॅसच्या काळाबाजाराबाबत तक्रार करण्यासाठी ०२५७-२२२३१८० हा मदत क्रमांक जाहीर केला आहे. मात्र, या क्रमांकावर गॅस कधी मिळणार, बुकिंग का होत नाही अशा चौकशीचे फोन अधिक येत असल्याने कर्मचारीही हतबल झाले आहेत.
दरम्यान, जिल्ह्यात सुमारे १२ लाखांहून अधिक गॅस ग्राहक असून दररोज सुमारे २५ हजार सिलिंडरचा वापर होतो. त्यात २० हजारांहून अधिक घरगुती आणि सुमारे साडेतीन हजार व्यावसायिक सिलिंडरचा समावेश आहे. लवकरच सुमारे १४ हजारांहून अधिक सिलिंडरचा पुरवठा जिल्ह्यात होणार असल्याची माहिती देण्यात आली आहे.

“जिल्ह्यात गॅस सिलिंडरचा साठा पुरेसा आहे. नागरिकांनी घाबरून जाऊ नये व अफवांना बळी पडू नये. काळाबाजार किंवा साठेबाजीबाबत माहिती असल्यास प्रशासनाला कळवावे.”
— रोहन घुगे, जिल्हाधिकारी, जळगाव