हिरापूर रोडवर घरफोडी; बंद घर फोडून अडीच लाखांचा ऐवज लंपास

हिरापूर रोडवर घरफोडी; बंद घर फोडून अडीच लाखांचा ऐवज लंपास

चाळीसगाव : शहरातील हिरापूर रोड परिसरात बंद घर फोडून अज्ञात चोरट्यांनी सुमारे २ लाख ५३ हजार ४०० रुपयांचा ऐवज लंपास केल्याची घटना उघडकीस आली आहे. या प्रकारामुळे परिसरात भीतीचे वातावरण निर्माण झाले आहे.

मिळालेल्या माहितीनुसार, हिरापूर रोडवरील सुयश लॉन्सजवळ राहणारे आबासाहेब देवराम जाधव (वय ६२) हे आपल्या पत्नीसह वास्तव्यास असून त्यांचा मुलगा नोकरीनिमित्त पुणे येथे राहतो. जाधव दाम्पत्य २४ मार्च रोजी मुलाकडे पुण्याला गेले होते. दरम्यान, ३० मार्च रोजी सायंकाळी शेजारी धनराज गायकवाड यांनी घराचा दरवाजा वाऱ्यामुळे आदळत असल्याची माहिती दिली.
यानंतर त्यांच्या मुलाने पाहणी केली असता घराच्या दरवाज्याच्या कड्या तुटलेल्या अवस्थेत आढळल्या. नातेवाईकांनी घरात जाऊन पाहणी केली असता घरातील सामान अस्ताव्यस्त पडलेले दिसून आले. जाधव दाम्पत्य परतल्यानंतर सविस्तर तपासणी केली असता कपाट फोडून त्यातील सोन्या-चांदीचे दागिने व रोख रक्कम चोरीला गेल्याचे उघड झाले.

चोरीस गेलेल्या ऐवजात मंगळसूत्र, नेकलेस, कानातील दागिने, नथ, अंगठ्या तसेच चांदीच्या मूर्ती, चैन, पैंजण यांचा समावेश आहे. अंदाजे ७५ ग्रॅम सोने, ४३ भार चांदीचे दागिने आणि ३ हजार ५०० रुपये रोख रक्कम असा एकूण २ लाख ५३ हजार ४०० रुपयांचा मुद्देमाल चोरट्यांनी लंपास केला आहे. ही घटना २४ ते ३० मार्चदरम्यान घडल्याचा अंदाज असून याप्रकरणी चाळीसगाव शहर पोलिस ठाण्यात गुन्हा दाखल करण्यात आला आहे.