हेल्थकेअर सिस्टीम प्रकल्प ठरणार ग्रामीण भागासाठी वरदान

हेल्थकेअर सिस्टीम प्रकल्प ठरणार ग्रामीण भागासाठी वरदान
आरोग्य सेवेसाठी गोदावरीच्या विद्यार्थ्यांचे अभिनव संशोधन
जळगाव — भारतातल्या आदीवासी व दुर्गम भागात आरोग्य सेवा अजूनही पोहचली नसल्याने आरोग्यविषयक समस्यांनी त्रस्त नागरिकांसाठी गोदावरी अभियांत्रिकीच्या विद्यार्थ्यांनी अभिनव संशोधन केले असून हेल्थ केअर सिस्टम प्रकल्प ग्रामीण भागासाठी वरदान ठरणार आहे.
गोदावरी फाउंडेशनच्या गोदावरी अभियांत्रिकी महाविद्यालय, जळगाव येथील संगणक अभियांत्रिकी विभागाच्या अंतिम वर्षातील विद्यार्थ्यांनी हेल्थकेअर सिस्टीम नावाने बुद्धिमान व अत्याधुनिक प्रकल्प विकसित केला आहे. या प्रकल्पात कृत्रिम बुद्धिमत्ता व नॅचरल लैंग्वेज प्रोसेसिंग तंत्रज्ञानाचा उपयोग करून संवादक्षम चॅटबोट तयार करण्यात आला आहे. हा चॅटबोट वापरकर्त्याच्या तोंडी लक्षणांवर आधारित संभाव्य आजाराचे अंदाज देत प्राथमिक सल्ला पुरवतो व आवश्यक असल्यास तात्काळ डॉक्टरकडे जाण्याची शिफारस करतो.ही सिस्टम अत्यंत उपयुक्त आहेत. वापरकर्ते मराठी, हिंदी आणि इंग्रजी भाषेत संवाद साधू शकतात, व्हॉइस इनपुटद्वारे आपली लक्षणे सांगू शकतात. ही प्रणाली ट्रायाज यंत्रणा वापरून आपत्कालीन लक्षणे वेगाने ओळखते आणि त्वरित उपाय सुचवते. त्याशिवाय वैयक्तिक आहार सल्ला, वेलनेस मार्गदर्शन, आणि आरोग्य सवयी सुधारण्यासाठी नियमित सूचना दिल्या जातात. सर्व माहिती डेटा एन्क्रिप्शनसह सुरक्षितपणे हाताळली जाते. ग्रामीण भागातील अल्पसाक्षर किंवा डिजिटल साक्षरता कमी असलेल्या नागरिकांसाठी ही प्रणाली मोबाईल अ‍ॅप स्वरूपात सहज वापरता येण्यासारखी असून, साध्या व संवादक्षम इंटरफेस द्वारे वापरकर्त्यांना सुलभ अनुभव देते.हा प्रकल्प सरकारी आरोग्य योजना, स्वयंसेवी संस्था, टेलिमेडिसिन स्टार्टअप्स, तसेच शैक्षणिक संशोधन प्रकल्पांमध्ये वापरण्यास उपयुक्त ठरणार आहे. विद्यार्थ्यांनी केवळ तांत्रिक ज्ञान वापरून नव्हे, तर समाजाच्या गरजांचा सखोल अभ्यास करून हा प्रकल्प तयार केला आहे. त्यामुळे तो सामाजिक बांधिलकीचं प्रतिक ठरतो.या टीममध्ये अभिजीत पवार, वैष्णवी माळी, राखी जे. राजपूत व तनुजा देव यांचा समावेश असून, त्यांनी हा प्रकल्प प्रा. प्रशांत शिंपी यांच्या मार्गदर्शनाखाली पूर्ण केला आहे. तसेच त्यांना महाविद्यालयातील डॉ. निलेश चौधरी व विभागप्रमुख प्रा. निलेश वाणी यांचे मार्गदर्शन लाभले. महाविद्यालयाचे प्राचार्य डॉ. विजयकुमार पाटील यांनी विद्यार्थ्यांचे अभिनंदन करताना सांगितले की, अभियांत्रिकी शिक्षण केवळ प्रयोगशाळांपुरते मर्यादित नसावे, तर ते समाजोपयोगी नवकल्पनांमध्ये बदलले पाहिजे.हेल्थकेअर सिस्टीम हा प्रकल्प त्या दिशेने एक भक्कम पाऊल आहे. सदर यशस्वी प्रकल्पाबद्दल गोदावरी फाउंडेशनचे अध्यक्ष डॉ. उल्हास पाटील, डॉ. वर्षा पाटील(सचिव), डॉ. केतकी पाटील (सदस्य), डॉ. वैभव पाटील (डी.एम कार्डिओलॉजिस्ट), डॉ. अनिकेत पाटील यांनी कौतुक केले.