१.९४ लाखांचा गांजा जप्त; मध्यप्रदेश व कर्नाटकचे दोन आरोपी अटकेत

जळगाव: फैजपूर उपविभागात पोलिसांनी मोठी कारवाई करत ९ किलो ७१७ ग्रॅम वजनाचा गांजा जप्त केला आहे. या गांजाची किंमत सुमारे १ लाख ९४ हजार ३४० रुपये इतकी असून, अंमली पदार्थ विक्रीच्या उद्देशाने हा गांजा बाळगणाऱ्या मध्यप्रदेश आणि कर्नाटक राज्यातील दोन आरोपींना अटक करण्यात आली आहे

२८ ऑगस्ट रोजी स्थानिक गुन्हे शाखेचे पोलीस उपनिरीक्षक शरद बागुल यांच्यासह त्यांचे पथक फैजपूर उपविभागात गस्त घालत होते. यावेळी त्यांना मिळालेल्या गोपनीय माहितीनुसार, न्हावी गावाजवळील एका शेतातील पत्र्याच्या घरात काही व्यक्ती गांजाची विक्री करण्याच्या उद्देशाने थांबले असल्याची माहिती मिळाली.

त्यानुसार, स्थानिक गुन्हे शाखेचे प्रमुख संदीप पाटील यांना माहिती देऊन त्यांच्या मार्गदर्शनाखाली फैजपूर पोलीस ठाणे गाठण्यात आले. प्रभारी अधिकारी सपोनि रामेश्वर मोताळे आणि यावल पोलीस स्टेशनचे निरीक्षक रंगनाथ धारबळे यांच्या उपस्थितीत एनडीपीएस कायद्यांतर्गत सर्व कायदेशीर प्रक्रिया पूर्ण करून छापा टाकण्यात आला.

न्हावी गावातून जानोरी गावाकडे जाणाऱ्या रस्त्यालगत असलेल्या किशोर भागवत पाटील यांच्या शेतात पोलिसांनी छापा टाकला. यावेळी घरात दोन संशयित व्यक्ती आढळून आल्या. त्यांची तपासणी केली असता त्यांच्याकडे ९ किलो ७१७ ग्रॅम वजनाचा गांजा सापडला.

या कारवाईत रगन सुकराम बारेला (वय ३२, रा. महादेव शिरवेल, जि. खरगोन, मध्यप्रदेश) आणि अझरुद्दीन अब्दुल वाहिद कुरेशी (वय २७, रा. सिध्दबलपूर, बेगळुरु, कर्नाटक) या दोन आरोपींना अटक करण्यात आली. त्यांच्या विरोधात फैजपूर पोलीस ठाण्यात गुन्हा दाखल करण्यात आला आहे.

ही कारवाई पोलीस अधीक्षक डॉ. महेश्वर रेड्डी, अपर पोलीस अधीक्षक अशोक नखाते आणि उपविभागीय पोलीस अधिकारी अनिल बडगुजर यांच्या मार्गदर्शनाखाली करण्यात आली. यामध्ये दोन्ही पोलीस ठाण्यांचे २० हून अधिक अधिकारी आणि कर्मचारी सहभागी होते.