५ नवीन आरोग्यवर्धिनी उपकेंद्रांना राज्यस्तरीय ‘एनक्यूएएस’ मानांकन

५ नवीन आरोग्यवर्धिनी उपकेंद्रांना राज्यस्तरीय ‘एनक्यूएएस’ मानांकन

जळगाव जिल्ह्यातील आरोग्य सेवांचा दर्जा उंचावला

जळगाव : जिल्ह्यातील आरोग्य सेवांचा स्तर उंचावण्यासाठी जिल्हा परिषद प्रशासन आणि आरोग्य विभाग सातत्याने प्रयत्नशील आहे. या प्रयत्नांना यश आले असून, राष्ट्रीय गुणवत्ता आश्वासक कार्यक्रमांतर्गत (एनक्यूएएस) जिल्ह्यातील आणखी ५ आरोग्यवर्धिनी उपकेंद्रांना राज्यस्तरीय गुणवत्ता मानांकन मिळाले आहे. आता जिल्ह्यातील मानांकन प्राप्त संस्थांची संख्या १८ वर पोहोचली आहे.
६ मार्च रोजी प्राप्त अहवालानुसार, या पाच उपकेंद्रांनी ८० टक्क्यांहून अधिक गुण मिळवून राज्य स्तरावर आपले स्थान मजबूत केले आहे. तालुका भडगाव येथील वडगाव नालबंदी उपकेंद्राने ८३ टक्के तर पळसखेडे उपकेंद्राने ८० टक्के गुण मिळवले, तर तालुका भुसावळमधील फेकरी उपकेंद्राने ८४ टक्के आणि शिंदी उपकेंद्राने ८७ टक्के गुण मिळवून गुणवत्ता सिद्ध केली. तसेच तालुका जळगावमधील जळगाव खुर्द उपकेंद्राने ८२ टक्के गुण मिळवले.
यापूर्वी जिल्ह्यात जानवे प्राथमिक आरोग्य केंद्र आणि १२ आरोग्यवर्धिनी उपकेंद्रांना हे मानांकन मिळाले होते. आता या ५ नवीन उपकेंद्रांच्या समावेशामुळे ही संख्या १८ वर पोहोचली आहे.
मुख्य कार्यकारी अधिकारी मिनल करणवाल यांनी सांगितले की, “राष्ट्रीय स्तरावरील निकषांनुसार आरोग्य सेवांची गुणवत्ता राखल्यामुळेच हे मानांकन मिळाले आहे. ग्रामीण भागातील नागरिकांना दर्जेदार, तत्पर आणि पारदर्शक आरोग्य सेवा मिळणार आहेत. या यशामुळे जिल्ह्याच्या शिरपेचात मानाचा तुरा रोवला गेला असून, आरोग्य विभागाचे कर्मचारी अभिनंदनास पात्र आहेत.”
‘एनक्यूएएस’ मानांकन मिळालेल्या केंद्रांमध्ये औषधसाठा, स्वच्छता, रुग्णांशी संवाद, तातडीची सेवा आणि सज्ज पायाभूत सुविधा यावर विशेष भर दिला जातो. यामुळे स्थानिक पातळीवरच रुग्णांना खात्रीशीर उपचार मिळणार आहेत. तसेच जिल्ह्यातील उर्वरित आरोग्य केंद्रांनाही असे मानांकन मिळवून देण्यासाठी आरोग्य विभाग प्रयत्नशील आहे.

जिल्हा आरोग्य अधिकारी डॉ. सचिन भायेकर म्हणाले, “हे उपकेंद्र स्थानिक रुग्णांना त्वरित आणि विश्वासार्ह सेवा देतील. औषधांची उपलब्धता, स्वच्छता आणि रुग्णांसोबत संवाद यावर विशेष भर दिला गेला आहे.”

या यशामुळे जळगाव जिल्ह्यातील आरोग्य सेवांचा दर्जा उंचावला असून, नागरिकांना दर्जेदार आणि तत्पर आरोग्य सेवा मिळण्यास आता अधिक खात्री मिळाली आहे.