७० ते ८० सराईत गुन्हेगारांवर हद्दपारीची कारवाई होणार

७० ते ८० सराईत गुन्हेगारांवर हद्दपारीची कारवाई होणार

मतदानासाठी काही तासांची मुभा ; मनपा निवडणुकीसाठी पोलीस यंत्रणा सज्ज

जळगाव | प्रतिनिधी जळगाव महानगरपालिका निवडणूक शांततेत, निर्भय आणि सुरळीत वातावरणात पार पडावी यासाठी जिल्हा पोलीस प्रशासनाने कडक उपाययोजनांचा आराखडा आखला असून संपूर्ण पोलीस यंत्रणा अलर्ट मोडवर कार्यरत झाली आहे. शहरातील सर्व पोलीस ठाण्यांच्या हद्दीतील सराईत, रेकॉर्डवरील व संशयित गुन्हेगारांची सखोल माहिती संकलित करण्यात आली असून निवडणूक कालावधीत सुमारे ७० ते ८० गुन्हेगारांना शहराबाहेर हद्दपार करण्याचा निर्णय घेण्यात आला आहे. मात्र, अशा व्यक्तींना मतदानाचा हक्क बजावण्यासाठी दोन ते तीन तासांची मर्यादित सवलत देण्यात येणार असल्याची माहिती पोलीस अधीक्षक डॉ. महेश्वर रेड्डी यांनी दिली.

महानगरपालिका निवडणुकीची रणधुमाळी सुरू होताच शहरात कायदा व सुव्यवस्था अबाधित राखण्यासाठी पोलीस प्रशासनाने अॅक्शन मोड स्वीकारला आहे. कोणताही अनुचित प्रकार घडू नये, तसेच दहशतीचे वातावरण निर्माण होऊ नये, यासाठी प्रतिबंधात्मक कारवाईवर भर देण्यात येत आहे. उपद्रवी घटकांवर नजर, गुन्हेगारी टोळ्यांचे हालचाली निरीक्षण, तसेच महत्त्वाच्या ठिकाणी नाकाबंदीचे नियोजन करण्यात आले आहे.

मतदानाच्या सुमारे ८ ते १५ दिवस आधीपासूनच हद्दपारीची कारवाई सुरू केली जाणार असून, हद्दपार व्यक्तींना केवळ मतदानाच्या दिवशी त्यांच्या संबंधित मतदान केंद्रावर मर्यादित वेळ उपस्थित राहण्याची परवानगी दिली जाणार आहे. मतदान पूर्ण झाल्यानंतर त्यांना त्वरित शहराबाहेर जाणे बंधनकारक राहणार आहे.

निवडणूक काळात अनेकांवर प्रतिबंधात्मक कारवाई करण्यात येणार असून काहींकडून बाँड भरून घेतले जातील, तर काहींना नोटिसा बजावण्यात येणार आहेत. आचारसंहितेचा भंग करणारे किंवा पूर्वी गुन्हे दाखल असलेले व्यक्ती यांच्यावर विशेष लक्ष ठेवले जाणार असून, आवश्यक असल्यास त्यांना नियमित पोलीस ठाण्यात हजेरी लावण्याचे आदेश देण्यात येणार आहेत.

महानगरपालिका निवडणुकीच्या पार्श्वभूमीवर जानेवारी महिन्याच्या पहिल्या आठवड्यापासून शहरातील पोलीस बंदोबस्तात लक्षणीय वाढ करण्यात येणार आहे. स्थानिक पोलीस अधिकारी व कर्मचारी यांच्यासह एसआरपी आणि आरसीपीच्या तुकड्यांची तैनाती केली जाणार असून, संपूर्ण निवडणूक प्रक्रिया शांततेत पार पाडण्यासाठी पोलीस प्रशासन पूर्णपणे सज्ज असल्याचे चित्र शहरात दिसून येत आहे