जुन्या वादातून तरुणावर चाकू हल्ला; पायावर दगड टाकून फ्रॅक्चर

जुन्या वादातून तरुणावर चाकू हल्ला; पायावर दगड टाकून फ्रॅक्चर

प्रतिनिधी | जळगाव
शहरातील छत्रपती शिवाजी नगरात जुन्या वादाच्या रागातून तिघांनी मिळून एका तरुणावर चाकू हल्ला करून गंभीर जखमी केल्याची घटना २३ मे रोजी रात्री ९.३० वाजता घडली. याप्रकरणी शहर पोलीस ठाण्यात शनिवारी (२४ मे) दुपारी गुन्हा दाखल करण्यात आला आहे.

गजानन विकास बाविस्कर (वय ३०, रा. छत्रपती शिवाजी नगर, हुडको, जळगाव) हे खासगी कंपनीत काम करणारे तरुण आपल्या कुटुंबासोबत वास्तव्याला आहेत. गुरुवारी रात्री ९.३० वाजता ते घराजवळ असताना जुन्या वादातून मनिष रामू बिऱ्हाडे, संगम देवा भोई व कृष्णा पांडुरंग सोनवणे (सर्व रा. जळगाव) या तिघांनी त्यांच्याशी वाद घालून शिवीगाळ केली.

यानंतर तिघांनी मिळून गजानन यांच्या डोक्यावर आणि हातावर चाकूने वार केले. त्यानंतर इतरांनी त्यांच्या छातीवर आणि पायावर मोठा दगड टाकून गंभीर दुखापत केली. यात गजानन बाविस्कर यांचा पाय फ्रॅक्चर झाला असून त्यांना उपचारासाठी जिल्हा शासकीय रुग्णालयात दाखल करण्यात आले आहे.

घटनेनंतर आरोपी घटनास्थळावरून फरार झाले. गजानन बाविस्कर यांच्या तक्रारीवरून शहर पोलीस ठाण्यात तिघांविरुद्ध गुन्हा दाखल करण्यात आला असून पुढील तपास पोहेकॉ ओमप्रकाश सोनी करीत आहेत.