राष्ट्रवादीत नवे पर्व; सुनेत्रा पवार राष्ट्रीय अध्यक्षा
प्रफुल्ल पटेल राष्ट्रीय कार्याध्यक्ष, सुनील तटकरे महाराष्ट्र प्रदेशाध्यक्ष; पार्थ पवार राज्यसभेसाठी उमेदवार
मुंबई : राष्ट्रवादी काँग्रेस पक्षाच्या राष्ट्रीय अधिवेशनात गुरुवारी महत्त्वपूर्ण निर्णय घेण्यात येत सुनेत्रा अजित पवार यांची पक्षाच्या राष्ट्रीय अध्यक्षपदी एकमताने निवड करण्यात आली. दिवंगत उपमुख्यमंत्री अजित पवार यांच्या अकाली निधनानंतर रिक्त झालेल्या पदावर झालेल्या या निवडीमुळे पक्षात नव्या पर्वाची सुरुवात झाल्याचे मानले जात आहे. तळागाळातील जनसंपर्क आणि सामाजिक कार्याचा अनुभव असलेल्या सुनेत्रा पवार यांच्या नेतृत्वावर पक्षाने शिक्कामोर्तब केले.
वरळी येथे पार पडलेल्या राष्ट्रीय अधिवेशनात खासदार प्रफुल्ल पटेल यांची राष्ट्रीय कार्याध्यक्षपदी, तर खासदार सुनील तटकरे यांची महाराष्ट्र प्रदेशाध्यक्षपदी फेरनिवड जाहीर करण्यात आली. अजित पवार यांच्या जाण्याने पक्षात निर्माण झालेली पोकळी भरून काढण्यासाठी संघटनात्मक बांधणी अधिक मजबूत करण्याचा निर्धार अधिवेशनात व्यक्त करण्यात आला.
निवडीनंतर बोलताना सुनेत्रा पवार म्हणाल्या, “महाराष्ट्राचे कल्याण, जनतेचे हित आणि राष्ट्रवादी काँग्रेसचा विचार पुढे नेणे हेच माझे प्रमुख ध्येय आहे. संपूर्ण पक्ष हाच माझा परिवार असून अजितदादांनी ज्या आत्मीयतेने हा परिवार जपला, त्याच जिव्हाळ्याने मी तो सांभाळेन.” शिव-शाहू-फुले-आंबेडकर आणि यशवंतराव चव्हाण यांच्या विचारांचा वारसा पुढे नेण्याचे आवाहनही त्यांनी केले.
दरम्यान, आगामी राज्यसभा निवडणुकीसाठी पक्षाकडून पार्थ पवार यांच्या उमेदवारीची अधिकृत घोषणा करण्यात आली. ही घोषणा प्रफुल्ल पटेल यांनी पत्रकार परिषदेत केली. येत्या १६ मार्च रोजी होणाऱ्या राज्यसभा निवडणुकीत पार्थ पवार हे राष्ट्रवादी काँग्रेसचे अधिकृत उमेदवार म्हणून अर्ज भरणार असल्याचे स्पष्ट करण्यात आले. पक्षातील या निर्णयांमुळे संघटनात्मक पातळीवर नवचैतन्य निर्माण झाल्याचे चित्र दिसून येत आहे.
दै. बातमीदार चे अपडेट्स मिळवण्यासाठी आम्हाला फॉलो करा
फेसबुक । ट्विटर ।युट्युब | इंस्टाग्राम | गुगल न्यूज | टेलिग्राम
