जळगाव पोलिसांचा वाळू माफियांवर ‘सर्जिकल स्ट्राईक’

जळगाव पोलिसांचा वाळू माफियांवर ‘सर्जिकल स्ट्राईक’

भल्या पहाटे गाव शोधमोहीम राबवत ४० वाहने जप्त

​नदीपात्रात पोलीस पोहचण्यापूर्वीच माफिया पसार; बांभोरीसह गिरणाकाठच्या गावांना पोलिसांनी घातला वेढा

​जळगाव (प्रतिनिधी) : शहरातील गिरणा नदीपात्रातून होणाऱ्या बेसुमार अवैध वाळू उपशाला आळा घालण्यासाठी पोलीस दलाने शुक्रवारी भल्या पहाटे ‘सर्च ऑपरेशन’ राबवत मोठी कारवाई केली. नदीपात्रालगतच्या बांभोरी, टाकरखेडा आणि खेडी या गावांना पोलिसांनी वेढा टाकत तब्बल ४० संशयास्पद वाहने जप्त केली. या मोहिमेत ३२ ट्रॅक्टर आणि ८ डंपर/ट्रकचा समावेश असून, ही सर्व वाहने पोलीस मुख्यालयात लावण्यात आली आहेत.

​भल्या पहाटे ‘अॅक्शन मोड’मध्ये पोलीस ताफा
उपविभागीय पोलीस अधिकारी नितीन गणापुरे यांच्या नेतृत्वाखाली जळगाव आणि चोपडा उपविभागातील सर्व पोलीस ठाण्यांचे अधिकारी, आरसीपीच्या दोन प्लाटून, क्यूआरटी पथक, स्थानिक गुन्हे शाखा आणि वाहतूक शाखेचा मोठा ताफा पहाटे ५ वाजेच्या सुमारास मैदानात उतरला. सुरुवातीला पोलीस पथक थेट गिरणा नदीपात्रात शिरले, मात्र कारवाईची कुणकुण लागताच वाळू माफिया वाहने घेऊन पसार झाले होते. त्यामुळे पोलिसांनी आपला मोर्चा थेट नदीकाठच्या गावांकडे वळवला.

​गाव केले पिंजून, सोबत होते ‘चावी तयार करणारे’
पोलिसांनी बांभोरीसह इतर गावांमध्ये शिरून गल्लीबोळ पिंजून काढले. ज्या घरांच्या बाहेर किंवा मोकळ्या जागेत विना क्रमांकाचे किंवा संशयास्पद ट्रॅक्टर, डंपर उभे होते, ती सर्व वाहने ताब्यात घेण्यात आली. अनेकदा कारवाईच्या वेळी माफिया ‘चावी नाही’ किंवा ‘चालक पळाला’ अशी कारणे देतात, हे लक्षात घेऊन पोलिसांनी यावेळी सोबत ‘चावी तयार करणाऱ्या’ कारागिरालाही नेले होते. त्यामुळे एकही वाहन जागेवर न थांबवता पोलिसांनी स्वतः चालवत पोलीस मुख्यालय गाठले.

​जिल्हाभरातही कारवाईचा धडाका
केवळ जळगावच नव्हे, तर जिल्हाभरात ही मोहीम राबवण्यात आली. यामध्ये कासोदा पोलीस ठाण्याने १५ ट्रॅक्टर, भडगाव पोलिसांनी १३ ट्रॅक्टर व १ डंपर, एरंडोल पोलिसांनी ४ ट्रॅक्टर व १ डंपर, तर मेहूणबारे पोलिसांनी १५ ट्रॅक्टर जप्त केले. मेहूणबारे येथे वाळूने भरलेले एक ट्रॅक्टरही पोलिसांच्या हाती लागले.

​आरंभी कुणकुण लागल्याने संशय
पोलीस पथक नदीपात्रात पोहचण्यापूर्वीच माफिया तेथून पसार झाल्याने, पोलीस दलातीलच काही कर्मचाऱ्यांचे वाळू माफियांशी हितसंबंध आहेत का? आणि त्यांनीच ‘टीप’ दिली का? असा संशय आता व्यक्त केला जात आहे. जप्त केलेली वाहने सध्या पोलीस मुख्यालयात असून, त्यांची कागदपत्रे आणि जुने गुन्हे याची तपासणी केली जात आहे. ज्या वाहनांची कागदपत्रे अपूर्ण आहेत, त्यांच्यावर कडक दंडात्मक कारवाई करण्यासाठी प्रादेशिक परिवहन विभागाला (RTO) पत्र देण्यात आले आहे.