नागपूर जिल्ह्यातील स्फोटात १५ कामगार ठार

नागपूर जिल्ह्यातील स्फोटात १५ कामगार ठार

काटोल तालुक्यातील राऊळगाव परिसरातील दारुगोळा कंपनी हादरली; मृतांचा आकडा वाढण्याची भीती

नागपूर : जिल्ह्यातील काटोल तालुक्यातील राऊळगावजवळ असलेल्या SBL Energy Limited या दारुगोळा निर्मिती करणाऱ्या कंपनीत आज सकाळी भीषण स्फोट होऊन १५ कामगारांचा मृत्यू झाला, तर अनेकजण गंभीर जखमी झाले आहेत. जखमींपैकी काहींची प्रकृती चिंताजनक असल्याने मृतांचा आकडा वाढण्याची भीती व्यक्त होत आहे.
मिळालेल्या माहितीनुसार, राऊळगावलगतच्या येनवरा गावाजवळील प्रकल्पात डेटोनेटर्स, स्लरी एक्सप्लोजिव्ह, कास्ट बूस्टर्स आणि सिस्मिक एक्सप्लोसिव्ह्जचे उत्पादन केले जाते. सकाळी सुमारे ७ वाजण्याच्या सुमारास एका युनिटमध्ये अचानक स्फोट झाला. त्या वेळी विविध विभागांत ३० हून अधिक कर्मचारी कार्यरत होते. या दुर्घटनेची पुष्टी नागपूर ग्रामीणचे पोलिस अधीक्षक हर्ष पोद्दार यांनी केली आहे.
दरम्यान, जखमींना तातडीने नागपूर येथील शासकीय व खासगी रुग्णालयांत हलविण्यात आले असून बचावकार्य सुरू आहे. स्फोटाचे नेमके कारण अद्याप स्पष्ट झाले नसून, पोलिस व संबंधित यंत्रणांकडून चौकशी सुरू आहे.