जामनेरमध्ये “स्वच्छता हीच सेवा” अंतर्गत महास्वच्छता अभियान

जामनेरमध्ये “स्वच्छता हीच सेवा” अंतर्गत महास्वच्छता अभियान

६९२ सदस्यांचा सहभाग; १९ टन कचरा संकलित

जामनेर : डॉ. नानासाहेब धर्माधिकारी प्रतिष्ठान आयोजित “स्वच्छता हीच सेवा” या महास्वच्छता अभियानांतर्गत रविवारी (दि. १ मार्च २०२६) जामनेर शहरात व्यापक स्वच्छता मोहीम राबविण्यात आली. हे अभियान देशभर एकाच दिवशी आयोजित करण्यात आले होते.
सकाळी ७.४५ वाजता स्वच्छता मोहिमेचा शुभारंभ झाला. यावेळी जामनेर नगर परिषदेच्या नगराध्यक्षा साधनाताई महाजन, उपनगराध्यक्ष डॉ. प्रशांत भाडे, जामनेर तालुका एज्युकेशन सोसायटीचे सचिव जितू पाटील, नगरसेवक महेंद्र बावस्कर, आतिष झाल्टे, सुभाष पवार, पप्पू पाटील आदी मान्यवर उपस्थित होते.

अभियान यशस्वी करण्यासाठी २ मालवाहू रिक्षा, १२ ट्रॅक्टर तसेच नगरपालिकेमार्फत २ ट्रॅक्टर व ३ घंटागाड्यांचे सहकार्य मिळाले. जामनेर परिसरातील १७ बैठकींमधून एकूण ६९२ सदस्य स्वच्छता मोहिमेत सहभागी झाले.

मोहिमेदरम्यान ७.६ टन ओला कचरा व ११.४ टन सुका कचरा असा एकूण १९ टन कचरा संकलित करण्यात आला. हा कचरा पहाडी बाबा येथील डम्पिंग ग्राउंडमध्ये जमा करण्यात आला. तसेच ११.३ किलोमीटर दुतर्फा रस्ते स्वच्छ करण्यात आले व सुमारे १,९९,८०० चौरस मीटर परिसर स्वच्छ करण्यात आला.

या उपक्रमासोबत प्रतिष्ठानतर्फे वृक्षलागवड व संवर्धन, रक्तदान शिबिर, विहीर पुनर्भरण, शैक्षणिक साहित्य वाटप, व्यवसाय मार्गदर्शन, अंध व अपंगांसाठी साहित्य वाटप, बसथांबे निर्मिती व पाणपोई आदी विविध सामाजिक उपक्रम राबविले जातात. हे उपक्रम आप्पासाहेब धर्माधिकारी आणि सचिनदादा धर्माधिकारी यांच्या मार्गदर्शनाखाली आयोजित केले जातात.
प्रतिष्ठानतर्फे भारतासह परदेशातही असे कार्यक्रम राबविले जात असून, समाजजागृती, अंधश्रद्धा निर्मूलन, व्यसनमुक्ती, स्वधर्म, स्वदेश, स्वदेव आणि मानवतावादी मूल्यांची जपणूक याबाबत मार्गदर्शन बैठकींच्या माध्यमातून केले जाते.