कोल्हेनगरमध्ये बंद घर फोडून चोरी; ४० हजारांचा ऐवज लंपास

कोल्हेनगरमध्ये बंद घर फोडून चोरी; ४० हजारांचा ऐवज लंपास

जळगाव : शहरातील रामानंद नगर पोलीस ठाण्याच्या हद्दीत असलेल्या कोल्हेनगर परिसरात बंद घर फोडून अज्ञात चोरट्यांनी सुमारे ४० हजार ४०० रुपयांचा मुद्देमाल चोरून नेल्याची घटना उघडकीस आली आहे. शनिवारी (दि. २८ फेब्रुवारी) सकाळी साडेसात वाजता हा प्रकार समोर आला. याप्रकरणी दुपारी चार वाजता अज्ञात व्यक्तींविरुद्ध गुन्हा दाखल करण्यात आला.

फिर्यादी मुरलीधर नारायण धांडे (वय ७५) हे सेवानिवृत्त असून ते काही दिवस घराबाहेर होते. २६ डिसेंबर २०२५ रोजी रात्री १० वाजेपासून ते २८ फेब्रुवारी २०२६ दरम्यानच्या कालावधीत ही चोरी झाल्याचा अंदाज व्यक्त करण्यात येत आहे. घर बंद असल्याची संधी साधून चोरट्यांनी मुख्य दरवाजाचे कुलूप तोडत आत प्रवेश केला.
यानंतर घरातील कपाटाचे कुलूपही फोडून त्यामधील सुमारे ४० हजार ४०० रुपये किमतीच्या चांदी व पितळी वस्तू लंपास करण्यात आल्या.

घर उघडताच चोरीचा प्रकार लक्षात येताच धांडे यांनी तात्काळ रामानंद नगर पोलीस स्टेशन येथे धाव घेऊन तक्रार दिली.
पोलिसांनी अज्ञात चोरट्यांविरुद्ध गुन्हा नोंदवला असून पुढील तपास पोलीस कॉन्स्टेबल शरद वंजारी करीत आहेत. परिसरातील सीसीटीव्ही फुटेजच्या आधारे आरोपींचा शोध सुरू आहे.