जळगावात ठाकरे गटाला धक्का

जळगावात ठाकरे गटाला धक्का

माजी खासदार उन्मेष पाटील शिंदे सेनेच्या वाटेवर; ६ मार्चला मुंबईत प्रवेश

जळगाव : जिल्ह्याच्या राजकारणात मोठी उलथापालथ घडण्याची चिन्हे स्पष्ट होत असून माजी खासदार उन्मेष पाटील हे आता शिवसेना (शिंदे गट)च्या वाटेवर असल्याचे निश्चित झाले आहे. सध्या शिवसेना (ठाकरे गट)मध्ये असलेले पाटील ६ मार्च रोजी मुंबईत खासदार श्रीकांत शिंदे यांच्या उपस्थितीत शेकडो कार्यकर्त्यांसह शिंदे गटात अधिकृत प्रवेश करणार असल्याची माहिती समोर आली आहे.

प्रवेशापूर्वी उन्मेष पाटील यांनी राज्याचे पाणीपुरवठा व स्वच्छता मंत्री तसेच जिल्ह्याचे पालकमंत्री गुलाबराव पाटील यांची भेट घेतली. या भेटीनंतर त्यांच्या पक्षप्रवेशावर शिक्कामोर्तब झाल्याचे मानले जात आहे. त्यामुळे जळगावातील ठाकरे गटासाठी हा मोठा राजकीय धक्का मानला जात आहे.

२०२४ च्या लोकसभा निवडणुकीवेळी भाजपकडून उमेदवारी नाकारल्यानंतर उन्मेष पाटील यांनी ठाकरे गटात प्रवेश केला होता. त्यानंतर त्यांनी २०२४ च्या विधानसभा निवडणुकीत चाळीसगाव मतदारसंघातून उमेदवारी देत निवडणूक लढवली; मात्र त्यांना पराभवाचा सामना करावा लागला. ठाकरे गटात असताना त्यांनी भाजप नेते गिरीश महाजन आणि आमदार मंगेश चव्हाण यांच्यावर टीकास्त्र सोडले होते.

आता महायुतीतील शिंदे गटात त्यांचा प्रवेश होत असल्याने भाजपकडून संभाव्य विरोधाची चर्चा राजकीय वर्तुळात रंगू लागली आहे. ६ मार्च रोजी होणारा हा प्रवेश सोहळा जळगावच्या राजकारणात नवे समीकरण निर्माण करणार का, याकडे सर्वांचे लक्ष लागले आहे.