महासती पूज्या श्री सुशीलाकुंवरजी म.सा.
यांचे देवलोकगमन
जैन समाज बांधवांमध्ये शोक
जळगाव (प्रतिनिधी) धर्मदास संप्रदायाच्या गौरवशाली परंपरेतील तप, त्याग आणि संयम यांची साक्षात प्रतिमा म्हणून ओळखल्या जाणाऱ्या तपस्वीराज पूज्य गुरुदेव श्री कानमुनिजी म.सा. यांच्या सुशिष्या तसेच पूज्य श्री गुलाबमुनिजी म.सा. यांच्या आज्ञानुवर्तिनी, वर्धमान आयंबिल तप दीर्घ आराधिका, स्थविरा, दीर्घसंयमी महासती पूज्या श्री सुशीलाकुंवरजी म.सा. यांचे वयाच्या ८७ व्या वर्षी सोमवार, दि. २ मार्च २०२६ रोजी सायंकाळी ५.३० वाजता धर्मनगरी जळगाव येथे त्याग-प्रत्याख्यानपूर्वक शांतपणे कालधर्म (देवलोकगमन) झाले. त्यांचा जळगाव येथे वृद्धापकाळा मुळे स्थिरवास (ठाणापती) होता. त्यांचे धार्मिक, आत्मोन्नतीरत साध्वीजीवन अन्य संत महात्म्यांसाठी प्रेरणादायी होते.
आफ्रिका येथे जन्मलेल्या पूज्य महासतीजींनी गुजरातमधील कनौड येथे दीक्षा स्वीकारून तब्बल ५७ वर्षे संयममय साधना, तपश्चर्या आणि धर्मप्रसाराचे अखंड कार्य केले. त्यांच्या देवलोकगमनामुळे जैन समाजासह सर्व धर्मप्रेमी भाविकांमध्ये हळहळ व्यक्त होत आहे. त्यांचे संपूर्ण जीवन त्याग, साधना आणि अध्यात्मिक मूल्यांचे प्रेरणादायी उदाहरण मानले जाते.
त्यांचे अंतिम दर्शन मंगळवार, दि. ३ मार्च २०२६ रोजी सकाळी ६.३० वाजेपर्यंत प्लॉट क्र. १३, गणपती नगर, स्वाध्याय भवनजवळ, जळगाव येथे ठेवण्यात आले आहे. त्यानंतर सकाळी ७.३० वाजता स्वाध्याय भवन येथून आकाशवाणी चौक, स्वातंत्र चौक, पांडे डेअरी चौक, पांजरपोळ गोशाळा मार्गे नेरी नाका वैकुंठधाम येथे डोली प्रस्थान होणार आहे. अंतिम यात्रेत पुरुषांनी पांढरा पोशाख तसेच महिलांनी लाल चुनरी परिधान करून उपस्थित राहावे, असे आवाहन श्री वर्धमान स्थानकवासी जैन श्रावक संघ, जळगावचे संघपती दलीचंद जैन यांनी केले आहे.
दै. बातमीदार चे अपडेट्स मिळवण्यासाठी आम्हाला फॉलो करा
फेसबुक । ट्विटर ।युट्युब | इंस्टाग्राम | गुगल न्यूज | टेलिग्राम
