नव्या प्रभाग रचनेनुसार आरोग्य निरीक्षकांची फेरनियुक्ती
वॉर्ड १ ते १९ साठी युनिट प्रमुख नियुक्त; स्वच्छता व्यवस्थेला गती देण्याचा प्रयत्न
जळगाव : प्रतिनिधी — नव्याने निश्चित करण्यात आलेल्या प्रभाग रचनेनुसार जळगाव महानगरपालिका प्रशासनाने वॉर्ड क्रमांक १ ते १९ साठी आरोग्य निरीक्षक व युनिट प्रमुखांची नव्याने नियुक्ती केली आहे. याबाबत सहायक आयुक्त (आरोग्य) उदय पाटील यांनी कार्यालयीन आदेश जारी केला असून, निवडणुकीनंतर झालेल्या प्रभाग पुनर्रचनेच्या अनुषंगाने ही कार्यवाही करण्यात आली आहे.
शहरातील प्रभागांची नव्याने विभागणी झाल्यानंतर संबंधित भागांचे क्षेत्रफळ, लोकसंख्या व कामकाजाचा आवाका लक्षात घेऊन अधिकाऱ्यांना जबाबदाऱ्या सोपविण्यात आल्या आहेत. स्वच्छता, कचरा व्यवस्थापन, आरोग्य तपासणी मोहीम तसेच प्रतिबंधात्मक उपाययोजना प्रभावीपणे राबविण्यासाठी ही फेरनियुक्ती महत्त्वाची मानली जात आहे.
मनपाच्या आदेशात नमूद केल्याप्रमाणे, शहरातील स्वच्छता व आरोग्यविषयक कामकाज अधिक कार्यक्षमतेने पार पाडणे हा या निर्णयामागील मुख्य उद्देश आहे. नव्या प्रभाग रचनेमुळे जबाबदाऱ्या स्पष्ट झाल्याने तक्रार निवारण व क्षेत्रनिहाय कामकाजात वेग येईल, अशी अपेक्षा व्यक्त केली जात आहे.
दै. बातमीदार चे अपडेट्स मिळवण्यासाठी आम्हाला फॉलो करा
फेसबुक । ट्विटर ।युट्युब | इंस्टाग्राम | गुगल न्यूज | टेलिग्राम
