लिफ्टच्या आमिषाने प्रवाशांची लूट; टोळीचा स्थानिक गुन्हे शाखेकडून पर्दाफाश

लिफ्टच्या आमिषाने प्रवाशांची लूट; टोळीचा स्थानिक गुन्हे शाखेकडून पर्दाफाश

एक आरोपी कारसह ताब्यात; इतर साथीदार फरार, शोधमोहीम सुरू

जळगाव : प्रतिनिधी शहरात लिफ्ट देण्याच्या बहाण्याने प्रवाशांना कारमध्ये बसवून शस्त्राचा धाक दाखवत लुटणाऱ्या टोळीचा जळगाव स्थानिक गुन्हे शाखा पथकाने पर्दाफाश केला आहे. या प्रकरणी एका आरोपीला अटक करण्यात आली असून गुन्ह्यात वापरलेली कार जप्त करण्यात आली आहे. उर्वरित साथीदारांचा शोध सुरू आहे.

दि. २८ फेब्रुवारी रोजी सायंकाळी सुमारे ५:१५ वाजता सलमान खान अमान उल्ला खान (रा. निंभोरा, ता. रावेर) हे अजिंठा चौफुली येथे उभे असताना पांढऱ्या रंगाच्या कारमधून आलेल्या चार इसमांनी त्यांना १०० रुपये भाड्यात रावेरला सोडण्याचे आमिष दाखवले. विश्वासाने कारमध्ये बसल्यानंतर काही अंतर गेल्यावर दोघांनी त्यांच्या कमरेला चाकू लावला, तर मागे बसलेल्या दोघांनी हात पकडून खिशातील ९,७०० रुपये जबरीने काढून घेतले आणि त्यांना रस्त्यात उतरवून पसार झाले.

या घटनेप्रकरणी एमआयडीसी पोलीस स्टेशन जळगाव येथे गुन्हा दाखल करण्यात आला होता. डॉ. महेश्वर रेड्डी, पोलीस अधीक्षक यांच्या मार्गदर्शनाखाली स्थानिक गुन्हे शाखेचे निरीक्षक राहुल गायकवाड यांनी तपासाची सूत्रे हाती घेतली. गोपनीय माहितीच्या आधारे गुन्ह्यात वापरलेली स्विफ्ट डिझायर (क्र. एमएच-४३-एबी-९२१०) ही सुमारे चार लाख रुपये किमतीची कार शोधून काढण्यात आली.

या प्रकरणी शंभू उर्फ पप्पू सुभाष पाटील (रा. केदार नगर, पिंप्राळा, जळगाव) याला अटक करण्यात आली आहे. तपासादरम्यान त्याच्या इतर साथीदारांची नावे समोर आली असून ते सराईत गुन्हेगार असल्याचे उघड झाले आहे. सध्या पोलीस त्यांचा शोध घेत आहेत.
या कारवाईत अपर पोलीस अधीक्षक अशोक नखाते, उपविभागीय पोलीस अधिकारी नितीन गणापुरे यांच्या मार्गदर्शनाखाली एलसीबीचे निरीक्षक राहुल गायकवाड, उपनिरीक्षक शरद बागल, सहायक फौजदार अतुल वंजारी, विजय पाटील, अक्रम शेख, नितीन बाविस्कर, रवींद्र कापडणे, किशोर पाटील, राहुल रगडे, छगन तायडे, प्रवीण चौरे आदींच्या पथकाने सहभाग घेतला.

प्रवाशांनी अनोळखी व्यक्तींच्या वाहनात बसताना सतर्क राहावे, असे आवाहन पोलिसांकडून करण्यात आले आहे. या प्रकरणाचा पुढील तपास पोलीस उपनिरीक्षक मोहम्मद अली सैय्यद करत आहेत.