नराधमाचे संतापजनक कृत्य! शाळेत सोडण्याच्या बहाण्याने १२ वर्षीय मुलीवर अत्याचार

नराधमाचे संतापजनक कृत्य! शाळेत सोडण्याच्या बहाण्याने १२ वर्षीय मुलीवर अत्याचार

​जळगाव तालुक्यातील  घटना; संशयित आरोपीला पोलिसांनी ठोकल्या बेड्या

​जळगाव (प्रतिनिधी) : जळगाव तालुक्यातील एका गावातून माणुसकीला काळिमा फासणारी अत्यंत धक्कादायक घटना समोर आली आहे. एका १२ वर्षीय अल्पवयीन विद्यार्थिनीला शाळेत सोडण्याच्या बहाण्याने नेऊन तिच्यावर अत्याचार केल्याचा संतापजनक प्रकार उघडकीस आला आहे. या प्रकरणी जळगाव एमआयडीसी पोलीस ठाण्यात गुन्हा दाखल करण्यात आला असून, पोलिसांनी नराधम आरोपीला तातडीने अटक केली आहे.

​शाळेच्या वाटेवरच घातला घाला
मिळालेल्या माहितीनुसार, पीडित अल्पवयीन मुलगी जळगाव तालुक्यातील एका गावाची रहिवासी आहे. संशयित आरोपी संदीप बळीराम तायडे (रा. , ता. जळगाव) याने २ मार्च रोजी दुपारी १२:३० वाजेच्या सुमारास पीडित मुलीशी गोड बोलून जवळीक साधली. सुरुवातीला त्याने तिच्याशी अश्लील वर्तन केले आणि त्यानंतर तिला ‘मी तुला शाळेत सोडतो’ असे आमिष दाखवून घरून नेले.

​झोपडीत नेऊन अत्याचार
नराधम संदीपने पीडितेला शाळेत नेण्याऐवजी नशिराबाद-भुसावळ रोडवरील एका निर्जन ठिकाणी असलेल्या झोपडीत नेले. तिथे तिच्या असहायतेचा फायदा घेत तिच्यावर अत्याचार केला. या भयावह प्रसंगानंतर घाबरलेल्या मुलीने घरी परतल्यावर सर्व आपबिती आपल्या पालकांना सांगितली. आपल्या चिमुरडीसोबत घडलेला हा प्रकार ऐकून पालकांना मोठा धक्का बसला. त्यांनी विलंब न लावता एमआयडीसी पोलीस ठाणे गाठून फिर्याद दिली.

​आरोपी अटकेत, तपास सुरू
पालकांच्या फिर्यादीवरून पोलिसांनी नराधम संदीप तायडे याच्या विरोधात पोक्सो कायद्यासह विविध कलमान्वये गुन्हा दाखल केला आहे. पोलिसांनी तातडीने कारवाई करत आरोपीला बेड्या ठोकल्या आहेत. या प्रकरणाचा पुढील तपास महिला सहाय्यक पोलीस निरीक्षक माधुरी बोरसे या करीत आहेत.

​या घटनेमुळे संपूर्ण परिसरात तीव्र संतापाची लाट उसळली असून, अशा विकृत मानसिकतेच्या नराधमाला कठोरत: कठोर शिक्षा व्हावी, अशी मागणी ग्रामस्थांकडून केली जात आहे.