छत्रपती शिवाजी महाराज महाराजस्व समाधान शिबीर अभियान सुरू

छत्रपती शिवाजी महाराज महाराजस्व समाधान शिबीर अभियान सुरू

मार्च ते मे २०२६ दरम्यान जिल्ह्यात विविध ठिकाणी शिबिरे; नागरिकांच्या महसुली तक्रारींचे तातडीने निराकरण

जळगाव महाराष्ट्र शासनाच्या महसूल व वन विभागाच्या १८ फेब्रुवारी २०२६ रोजीच्या शासन निर्णयानुसार राज्यभर “छत्रपती शिवाजी महाराज महाराजस्व समाधान शिबीर अभियान – टप्पा क्र. १” राबविण्यात येणार आहे. या अभियानाची अंमलबजावणी मार्च ते मे २०२६ या कालावधीत करण्यात येणार असून जिल्ह्यात विविध महसूल मंडळ स्तरावर तसेच नगर परिषद व नगर पंचायत स्तरावर एकदिवसीय समाधान शिबिरांचे आयोजन करण्यात येणार असल्याची माहिती प्रशासनाने प्रसिद्धीपत्रकाद्वारे दिली आहे.
या अभियानाच्या माध्यमातून सर्वसामान्य नागरिक, शेतकरी, महिला तसेच विद्यार्थ्यांचे महसूल विभागाशी संबंधित दैनंदिन प्रश्न आणि प्रलंबित प्रकरणे तातडीने निकाली काढण्यावर भर दिला जाणार आहे. याशिवाय महाराष्ट्र जमीन महसूल संहितेतील नव्या तरतुदींबाबत जनजागृती करणे, शासनाच्या डिजिटल (ऑनलाईन) सेवांचा वापर वाढविणे आणि एकाच दिवशी सेवा वितरण प्रणालीद्वारे विविध महसुली सेवा नागरिकांना उपलब्ध करून देणे हा या उपक्रमामागील मुख्य उद्देश आहे.
या शिबिरांमध्ये नागरिकांना ७/१२ व ८अ उतारे, विविध दाखले, महसुली नोंदींमधील दुरुस्ती, प्रलंबित प्रकरणांचे निराकरण तसेच महसूल कायद्यांबाबत मार्गदर्शन अशा अनेक सेवा देण्यात येणार आहेत. जिल्ह्यातील जळगाव, जामनेर, एरंडोल, धरणगाव, पारोळा, भुसावळ, बोदवड, मुक्ताईनगर, रावेर, यावल, अमळनेर, चोपडा, पाचोरा, भडगाव आणि चाळीसगाव या तालुक्यांतील विविध महसूल मंडळांमध्ये ७ मार्चपासून महाराजस्व समाधान शिबिरांचे आयोजन करण्यात येणार आहे.

नागरिकांनी आपल्या महसुली अडचणी, प्रलंबित अर्ज तसेच आवश्यक कागदपत्रांसह संबंधित शिबिरांमध्ये उपस्थित राहून या अभियानाचा लाभ घ्यावा, असे आवाहन जिल्हाधिकारी रोहन घुगे यांनी केले आहे.