मेहरूण स्मशानभूमीसाठी ५ कोटींची तरतूद करण्याची मागणी

मेहरूण स्मशानभूमीसाठी ५ कोटींची तरतूद करण्याची मागणी

जळगाव : मेहरूण परिसरातील स्मशानभूमीचे सुशोभीकरण व आवश्यक सुविधा उपलब्ध करून देण्यासाठी जळगाव महानगरपालिकेच्या आगामी अर्थसंकल्पात ५ कोटी रुपयांची तरतूद करावी, अशी मागणी महापौर दीपमाला काळे यांच्याकडे निवेदनाद्वारे करण्यात आली आहे.

मेहरूण परिसरातील छत्रपती शिवाजी महाराज उद्यानाजवळ असलेल्या स्मशानभूमीत अनेक वर्षांपासून मूलभूत सुविधांचा अभाव असल्याने अंत्यसंस्कार व धार्मिक विधींसाठी येणाऱ्या नागरिकांना मोठ्या अडचणींचा सामना करावा लागत असल्याचे निवेदनात नमूद करण्यात आले आहे. तांबापूर, इच्छादेवी, आदर्शनगर, महाबळ कॉलनी, सुप्रिम कॉलनी, रामेश्वर कॉलनी आदी भागातील नागरिक या स्मशानभूमीचा वापर करतात.

स्मशानभूमीत अंत्यसंस्कारासाठी असलेले ओटे व त्यावरील लोखंडी पिंजरे तुटलेल्या अवस्थेत असून ओट्यांची संख्या अपुरी आहे. त्यामुळे नवीन ओटे उभारण्यात यावेत, अशी मागणी करण्यात आली आहे. तसेच रात्रीच्या वेळी परिसरात अंधार असल्याने पथदिव्यांची संख्या वाढविणे आवश्यक असल्याचेही सांगण्यात आले.

स्मशानभूमीला चारही बाजूंनी कंपाऊंड वॉल उभारून रस्ता वाहतुकीसाठी बंद करावा व दोन्ही बाजूंना गेट बसवावे, बसण्यासाठी बाके बसवावीत, अंत्यसंस्कारासाठी मनपा निधीतून लाकूड व इतर साहित्याची व्यवस्था करावी, पावसाळ्यात सुमारे हजार नागरिक बसू शकतील असे शेड उभारावे, महादेव मंदिराकडील जुना रस्ता काँक्रिटीकरण करून पथदिव्यांची व्यवस्था करावी तसेच परिसराचे सुशोभीकरण करावे, अशी मागणी करण्यात आली आहे.

ही सर्व कामे करण्यासाठी मनपाच्या अर्थसंकल्पात ५ कोटी रुपयांची तरतूद करावी, अन्यथा महानगरपालिकेसमोर आंदोलन करण्याचा इशारा माजी नगरसेवक अशोक लाडवंजारी, सुनील माळी व राजू मोरे यांनी दिला आहे.