जळगाव पोलीस दलाचा महिला सुरक्षेसाठी ‘भरोसा’; २.९७ कोटींच्या भव्य इमारतीचे पालकमंत्र्यांच्या हस्ते भूमिपूजन

जळगाव पोलीस दलाचा महिला सुरक्षेसाठी ‘भरोसा’; २.९७ कोटींच्या भव्य इमारतीचे पालकमंत्र्यांच्या हस्ते भूमिपूजन

​पोलीस अधीक्षक कार्यालय परिसरात साकारणार ‘भरोसा सेल व समुपदेशन केंद्र’; पीडितांना एकाच छताखाली मिळणार सर्व मदत

​जळगाव | प्रतिनिधी
जळगाव जिल्हा पोलीस दलाच्या माध्यमातून महिला आणि बालकांच्या सुरक्षिततेसाठी एक अत्यंत महत्त्वाचे पाऊल उचलण्यात आले आहे. पोलीस अधीक्षक कार्यालय परिसरात पीडित महिला व बालकांना तत्पर न्याय आणि मानसिक आधार देण्यासाठी ‘भरोसा सेल व समुपदेशन केंद्राच्या’ नवीन इमारतीचा भव्य भूमिपूजन सोहळा रविवारी, ८ मार्च रोजी उत्साहात पार पडला. जिल्ह्याचे पालकमंत्री तथा पाणी पुरवठा व स्वच्छता मंत्री ना. गुलाबराव पाटील यांच्या शुभहस्ते या इमारतीचे भूमिपूजन करण्यात आले.

​या केंद्राच्या माध्यमातून पीडित महिला आणि बालकांना कायदेशीर साहाय्य, मानसिक समुपदेशन आणि पोलीस मदत अशा सर्व सुविधा एकाच छताखाली उपलब्ध करून दिल्या जाणार आहेत. आधुनिक सोयी-सुविधांनी सज्ज असणारी ही इमारत सामाजिक सुरक्षिततेच्या दृष्टीने जळगाव पोलीस दलाचा एक ‘मैलचा दगड’ ठरणार आहे.

​
​निधी तरतूद: या महत्त्वपूर्ण प्रकल्पासाठी जिल्हा नियोजन समितीच्या (DPDC) माध्यमातून एकूण २ कोटी ९७ लाख रुपयांच्या निधीला मंजुरी मिळाली आहे.

​विभागाच्या देखरेखीखाली हे काम होणार असून, चाळीसगाव येथील ‘मे. जगन्नाथ इन्फ्रा कंपनी’ या कंत्राटदार संस्थेमार्फत बांधकाम पूर्ण केले जाईल.

​नियोजन: सार्वजनिक बांधकाम विभागाचे कार्यकारी अभियंता राहुल दे. पाटील व उपविभागीय अधिकारी सुनील ल. देवरे यांच्या मार्गदर्शनाखाली हे काम वेळेत पूर्ण करण्याचे नियोजन आहे.

​मान्यवरांची उपस्थिती
​कार्यक्रमाच्या सुरुवातीला पोलीस अधीक्षक डॉ. महेश्वर रेड्डी यांनी प्रास्ताविकातून या केंद्राच्या उभारणीमागचा मुख्य उद्देश स्पष्ट केला. यावेळी व्यासपीठावर अपर पोलीस अधीक्षक अशोक नखाते, उपविभागीय पोलीस अधिकारी नितीन गणापुरे, जिल्हा विशेष शाखेचे पोलीस निरीक्षक सतीश गोराडे, स्थानिक गुन्हे शाखेचे पोलीस निरीक्षक राहुल गायकवाड यांच्यासह शहरातील सर्व पोलीस ठाण्यांचे प्रभारी अधिकारी आणि पोलीस अंमलदार मोठ्या संख्येने उपस्थित होते.
​कार्यक्रमाचे नेटके सूत्रसंचालन आणि उपस्थितांचे आभार जळगाव उपविभागाचे पोलीस अधिकारी नितीन गणापुरे यांनी मानले.

पालकमंत्री गुलाबराव पाटील यांनी पोलीस प्रशासनाच्या या सकारात्मक पुढाकाराचे विशेष कौतुक करत, यामुळे पीडित महिलांना मोठा आधार मिळेल, असा विश्वास व्यक्त केला.