मध्य रेल्वे आरपीएफची ड्रग्ज तस्करीविरुद्ध मोठी कारवाई; 43 किलो गांजा जप्त

मध्य रेल्वे आरपीएफची ड्रग्ज तस्करीविरुद्ध मोठी कारवाई; 43 किलो गांजा जप्त

जळगाव / नागपूर : मध्य रेल्वेच्या रेल्वे संरक्षण दलाने (आरपीएफ) अमली पदार्थांच्या तस्करीविरुद्ध मोठी कारवाई केली असून या कारवाईत तब्बल 12.82 लाख रुपये किमतीचे 43 किलो गांजा जप्त करण्यात आले आहे. आरपीएफने या कारवाईत ड्रग्ज तस्करीच्या मोठ्या सिंडिकेटचा भांडाफोड केला आहे.

नागपूर आरपीएफ पथकाने 6 फेब्रुवारी 2026 रोजी निरीक्षण करत असताना संशयावरून एका व्यक्तीला दोन बॅगा घेऊन जाताना ताब्यात घेतले. बॅग तपासणी दरम्यान 24.80 किलो वजनाचे 9 पॅकेट गांजा सापडले, ज्याची अंदाजे किंमत 3.72 लाख रुपये होती. चौकशीत आरोपीचा गावी भिंड येथील रहिवासी शाहिद खान असल्याचे उघड झाले. तो या ड्रग्ज पॅकेट ग्वालियरला पोहोचवण्यासाठी नेत होता.

आरोपीला ताब्यात घेऊन पुढील कारवाईसाठी नागपूरच्या शासकीय रेल्वे पोलीसांकडे (GRP) सोपवण्यात आले.
तर दुसरी महत्त्वाची कारवाई कलबुरगि आरपीएफ पथकाने 3 फेब्रुवारी 2026 रोजी जीआरपीच्या समन्वयाने केली. गुप्त माहितीनुसार ट्रेन क्रमांक 11020 कोणार्क एक्सप्रेस तपासली असता कोच बी-1 मध्ये बर्थ क्रमांक 41 खाली एक बेवारस बॅग आढळली. साक्षीदारांच्या उपस्थितीत बॅग उघडली असता त्यात 18.20 किलो वजनाचे 18 बंडल गांजा सापडले, ज्याची किंमत 9.10 लाख रुपये आहे. जप्त केलेले साहित्य सील करून अज्ञात व्यक्तीविरुद्ध वाडी पोलिस ठाण्यात गुन्हा दाखल करण्यात आला.

दोन्ही ऑपरेशन आरपीएफ आणि जीआरपी पथकांच्या उत्कृष्ट समन्वयातून यशस्वीरीत्या पार पडले असून, या कारवाईमुळे मध्य रेल्वे मार्गावर ड्रग्ज तस्करीवर मोठा धक्का बसला आहे.