चोपड्यात २ हजार थकबाकीदारांना नोटिसा; अवैध नळ कनेक्शन कट करण्याचा इशारा

चोपड्यात २ हजार थकबाकीदारांना नोटिसा; अवैध नळ कनेक्शन कट करण्याचा इशारा

चोपडा, प्रतिनिधी :शहरातील मालमत्ता कर, पाणीपट्टी व अन्य थकबाकी वसुलीसाठी चोपडा नगरपरिषदेकडून धडक मोहीम राबविण्यात येत असून सुमारे दोन हजार थकबाकीदारांना नोटिसा बजावण्यात आल्या आहेत. ठरावीक मुदतीत थकबाकी न भरल्यास नळ कनेक्शन कट करणे, गाळे सील करणे तसेच जप्तीची कारवाई करण्यात येणार असल्याचा इशारा प्रशासनाने दिला आहे.

नगरपरिषदेच्या वसुली पथकांकडून विविध प्रभागांमध्ये घरोघरी जाऊन नागरिकांना नोटिसा देण्यात येत आहेत. मागील आठवड्यातही काही ठिकाणी नळ कनेक्शन कट करणे व नगरपरिषदेच्या गाळ्यांना सील लावण्याची कारवाई करण्यात आली होती.

दरम्यान, शहरात अनेक ठिकाणी अवैध नळ कनेक्शन आढळून आल्याने संबंधितांनी तातडीने कनेक्शन वैध करून घ्यावे, अन्यथा अचानक तपासणी करून कनेक्शन तोडण्यात येईल, असा इशाराही नगरपरिषद प्रशासनाने दिला आहे.