पाळधीत दोन ठिकाणी घरफोडी; लाखोंचा ऐवज लंपास

पाळधीत दोन ठिकाणी घरफोडी; लाखोंचा ऐवज लंपास

नागरिक धास्तावले; पोलीस गस्त वाढवण्याची मागणी

पाळधी, ता. धरणगाव | प्रतिनिधी : पाळधी गावात मंगळवारी मध्यरात्री दोन ठिकाणी घरफोडी झाल्याने परिसरात खळबळ उडाली आहे. या घरफोड्यांमध्ये रोख रक्कम व सोने-चांदीचे दागिने असा लाखोंचा ऐवज चोरट्यांनी लंपास केल्याची माहिती समोर आली आहे. मात्र सायंकाळपर्यंत पाळधी पोलिसांत गुन्हा दाखल न झाल्याने नेमकी किती चोरी झाली, याबाबत स्पष्ट माहिती मिळू शकली नाही. त्यामुळे गावात भीतीचे वातावरण पसरले आहे.

साईबाबा नगरमधील रहिवासी सुरेश तुकाराम पाटील हे कामानिमित्त अमळनेर येथे गेले होते. त्यांच्या घराला कुलूप असल्याची संधी साधून चोरट्यांनी मध्यरात्री घराचा कडीकोयंडा तोडून आत प्रवेश केला. घरातील कपाट उघडून त्यातील सोने-चांदीचे दागिने व रोख रक्कम चोरून नेली. सकाळी घरी परतल्यानंतर घराचा दरवाजा उघडा व कपाटातील साहित्य अस्ताव्यस्त पडलेले दिसल्याने पाटील यांनी तातडीने पाळधी पोलीस चौकीत जाऊन घटनेची माहिती दिली.

दुसरी घटना भजी गल्ली परिसरात घडली. येथील भूषण प्रभाकर पाटील यांनी घराला खाली कुलूप लावून वरच्या मजल्यावर झोप घेतली होती. याच संधीचा फायदा घेत चोरट्यांनी मध्यरात्री घराचा कडीकोयंडा तोडून कपाटातील दागिने व रोख रक्कम चोरून नेली. या घटनेची माहितीही त्यांनी पाळधी पोलिसांना दिली आहे.
सकाळी उघडकीस आलेल्या या दोन्ही घटनांमुळे परिसरात खळबळ उडाली असून दिवसभर पाळधी पोलिसांचा फौजफाटा घटनास्थळी दाखल झाला होता. पोलिसांनी परिसरातील सीसीटीव्ही फुटेजची तपासणी सुरू केली आहे.