डॉ. उल्हास पाटील वैद्यकीय महाविद्यालयात ‘नो स्मोकिंग डे’ निमित्त जनजागृती

डॉ. उल्हास पाटील वैद्यकीय महाविद्यालयात ‘नो स्मोकिंग डे’ निमित्त जनजागृती

जळगाव : एक सिगारेट आयुष्य कमी करत असेल, पण धूम्रपान न करण्याचा एक निर्णय आयुष्य वाचवू शकतो, असे प्रभावी प्रतिपादन प्रा. डॉ. दयाघन राणे यांनी केले.भुसावळ येथील डॉ. उल्हास पाटील वैद्यकीय महाविद्यालय व रुग्णालय, जळगाव येथे नुकताच नो स्मोकिंग डे कार्यक्रम उत्साहात साजरा करण्यात आला. रोटरी क्लब ऑफ भुसावळ आणि डॉ. उल्हास पाटील मेडिकल कॉलेज यांच्या संयुक्त विद्यमाने या कार्यक्रमाचे आयोजन करण्यात आले होते.

या कार्यक्रमासाठी नशाबंदी मंडळ, महाराष्ट्र राज्याचे जळगाव जिल्हा संघटक तसेच नाशिक विभागीय संघटक प्रमुख म्हणून कार्यरत असलेले प्रा. डॉ. दयाघन राणे प्रमुख मार्गदर्शक म्हणून उपस्थित होते.कार्यक्रमास डॉ.उल्हास पाटील वैद्यकिय महाविद्यालयाचे वैद्यकिय संचालक डॉ. एन. एस. आर्वीकर, अधिष्ठाता डॉ. प्रशांत सोळंके,हदयरोग तज्ञ संचालक डॉ. वैभव पाटील, स्त्रीरोग शास्त्र विभाग प्रमुख डॉ. सौ. माया आर्वीकर तसेच प्राध्यापक वर्ग आणि एम.बी.बी.एस.चे विद्यार्थी मोठ्या संख्येने उपस्थित होते.

पुढे बोलतांना प्रा. डॉ. दयाघन राणे यांनी तंबाखू व सिगारेट सेवनाचे शरीरावर होणारे दुष्परिणाम,व्यसन कसे लागते आणि त्यातून अनेक गंभीर आजार कसे निर्माण होतात याची माहिती त्यांनी विविध सर्वेक्षणांच्या आधारे स्पष्ट केली. तंबाखूमुळे कर्करोग, हृदयरोग, फुफ्फुसांचे आजार तसेच श्वसनाचे गंभीर विकार होण्याचा धोका वाढतो, तसेच भारतात दरवर्षी लाखो मृत्यू तंबाखूजन्य आजारांमुळे होतात.डॉक्टर हे समाजासाठी रोल मॉडेल असतात. त्यामुळे डॉक्टरांनी स्वतः धूम्रपानापासून दूर राहून समाजाला योग्य संदेश द्यावा, असे आवाहनही त्यांनी मेडिकलच्या विद्यार्थ्यांना केले.

एक सिगारेट आयुष्य कमी करत असेल, पण धूम्रपान न करण्याचा एक निर्णय आयुष्य वाचवू शकतो, असे सांगत त्यांनी धूम्रपानमुक्त जीवनाचा संदेश दिला.कार्यक्रमात प्रा. डॉ. दयाघन राणे यांचा परिचय वैद्यकिय संचालक डॉ. एन. एस. आर्वीकर यांनी करून दिला, तर स्वागत स्त्रीरोग शास्त्र विभाग प्रमुख डॉ. माया आर्वीकर यांनी केले. अधिष्ठाता डॉ. प्रशांत सोळंके तसेच डॉ. वैभव पाटील यांचे स्वागत रो. गजानन सेवलकर यांनी केले. रोटरी क्लब ऑफ भुसावळचे सचिव रो. रत्नाकर क्षीरसागर यांचे स्वागत डॉ. प्रशांत सोळंके यांनी केले.कार्यक्रमाचे प्रास्ताविक व आभार प्रदर्शन डॉ. एन. एस. आर्वीकर यांनी केले.