गॅस तुटवड्यामुळे ग्रामीण भागात पुन्हा चुली पेटल्या

गॅस तुटवड्यामुळे ग्रामीण भागात पुन्हा चुली पेटल्या

सिलिंडर मिळण्यासाठी महिनाभर प्रतीक्षा; स्वयंपाकासाठी लाकडी चुलीचा पर्याय

चाळीसगाव : तालुक्यातील ग्रामीण भागात घरगुती गॅस सिलिंडरचा पुरवठा कमी होत असल्याने अनेक कुटुंबांना पुन्हा पारंपरिक लाकडी चुलीचा आधार घ्यावा लागत असल्याचे चित्र दिसून येत आहे. गॅस सिलिंडर मिळण्यात होणारा विलंब आणि वाढती मागणी यामुळे स्वयंपाकासाठी गॅसची बचत करण्याच्या उद्देशाने अनेक कुटुंबांनी चुली पेटवण्यास सुरुवात केली आहे.
गेल्या काही वर्षांत ग्रामीण भागातही गॅस सिलिंडरचा वापर मोठ्या प्रमाणावर वाढला होता. विशेषतः केंद्र सरकारच्या उज्ज्वला योजनेमुळे आर्थिकदृष्ट्या दुर्बल कुटुंबांपर्यंत गॅस सिलिंडर पोहोचल्याने चुलीवरील धुरापासून गृहिणींना मोठा दिलासा मिळाला होता. त्यामुळे अनेक गावांमध्ये पारंपरिक चुलींचा वापर जवळपास बंद झाल्याचे चित्र निर्माण झाले होते.
मात्र सध्या गॅस सिलिंडरचा पुरवठा कमी होत असल्याने अनेक ठिकाणी सिलिंडर मिळण्यासाठी एक ते दीड महिना प्रतीक्षा करावी लागत असल्याची तक्रार नागरिकांकडून केली जात आहे. परिणामी ग्रामीण भागातील कुटुंबांनी स्वयंपाकासाठी पुन्हा लाकडी चुलींचा वापर सुरू केला आहे.
दरम्यान, लाकडाचा वापर वाढल्यास अवैध वृक्षतोड होण्याची शक्यता असल्याची चिंता पर्यावरणप्रेमींनी व्यक्त केली आहे. तसेच लग्नकार्य किंवा कौटुंबिक कार्यक्रम असलेल्या कुटुंबांना अतिरिक्त गॅस सिलिंडरची गरज भासल्यास त्यांच्या अडचणीत आणखी वाढ होऊ शकते, असेही नागरिकांचे म्हणणे आहे.
“गॅस सिलिंडरचा पुरवठा नियमित झाला नाही, तर ग्रामीण भागात पुन्हा मोठ्या प्रमाणावर चुलींचा वापर वाढेल,” — स्थानिक नागरिक, चाळीसगाव तालुका.