जळगाव मनपात 7 स्वीकृत नगरसेवकांची निवड
भाजपचे चार, शिवसेना (शिंदे गट) दोन तर उबाठाकडून एक सदस्य निश्चित
जळगाव : महानगरपालिकेतील बहुप्रतीक्षित स्वीकृत नगरसेवक निवड प्रक्रिया अखेर पूर्ण झाली असून सात जागांवर सदस्यांची निवड निश्चित करण्यात आली आहे. यामध्ये भाजपकडून चार, शिवसेना (शिंदे गट) कडून दोन आणि शिवसेना (उद्धव बाळासाहेब ठाकरे) गटाकडून एका सदस्याची निवड करण्यात आली आहे.
यापूर्वी २७ मार्च रोजी झालेल्या छाननी प्रक्रियेत पाच अर्ज वैध ठरले होते. त्यात भाजपचे तीन आणि शिवसेनेचे दोन सदस्य निश्चित झाले होते. मात्र, भाजपच्या दोन अर्जांमधील तांत्रिक त्रुटी तसेच शिवसेना (उबाठा) गटातील गटनेता पदावरील वादामुळे दोन अर्जांवर निर्णय प्रलंबित ठेवण्यात आला होता.
दरम्यान, २ एप्रिल रोजी झालेल्या अंतिम छाननीत भाजपचे राहुल वाघ यांनी माघार घेतल्याने सुभाष शौचे यांचा अर्ज वैध ठरला. तसेच विभागीय आयुक्तांकडून गटनेता बदलाची नोंद झाल्यानंतर अर्शानबी खाटीक यांनी सुचविलेला शरद तायडे यांचा अर्जही मंजूर करण्यात आला.
निवड झालेल्या स्वीकृत नगरसेवकांमध्ये भाजपकडून डॉ. राधेश्याम चौधरी, प्रदीप रोटे, रमेश मतानी आणि सुभाष शौचे यांचा समावेश आहे. शिवसेना (शिंदे गट) कडून हर्षल मावळे आणि नरेंद्र सोनवणे यांना संधी देण्यात आली असून शिवसेना (उबाठा) गटाकडून शरद तायडे यांची निवड करण्यात आली आहे.
या निवडीमुळे मनपातील राजकीय समीकरणे स्पष्ट झाली असून पुढील निर्णय प्रक्रियेत या नव्या सदस्यांची भूमिका महत्त्वाची ठरणार आहे.
दै. बातमीदार चे अपडेट्स मिळवण्यासाठी आम्हाला फॉलो करा
फेसबुक । ट्विटर ।युट्युब | इंस्टाग्राम | गुगल न्यूज | टेलिग्राम
