ज्येष्ठ गायिका आशा भोसले यांचे निधन; संगीतविश्वावर शोककळा

ज्येष्ठ गायिका आशा भोसले यांचे निधन; संगीतविश्वावर शोककळा

९२ व्या वर्षी घेतला अखेरचा श्वास; उद्या शिवाजी पार्क येथे अंत्यसंस्कार

मुंबई : भारतीय संगीतविश्वातील अजरामर आवाज म्हणून ओळखल्या जाणाऱ्या आशा भोसले यांचे मुंबईतील ब्रीच कँडी रुग्णालय येथे निधन झाले. त्या ९२ वर्षांच्या होत्या. त्यांच्या निधनाने हिंदी चित्रपटसृष्टीसह संपूर्ण कला क्षेत्रावर शोककळा पसरली आहे.

छातीच्या संसर्गामुळे रुग्णालयात दाखल
छातीत संसर्ग झाल्याने त्यांना शनिवारी उशिरा रुग्णालयात दाखल करण्यात आले होते. मात्र प्रकृतीत सुधारणा न झाल्याने अखेर त्यांची प्राणज्योत मालवली. आपल्या वैशिष्ट्यपूर्ण आणि चिरतरुण आवाजाने त्यांनी अनेक दशकं रसिकांच्या मनावर अधिराज्य गाजवले.

पुत्र आनंद भोसले यांची माहिती
त्यांचे सुपुत्र आनंद भोसले यांनी निधनाची माहिती देताना सांगितले की, अवयव निकामी होत गेल्याने त्यांचे निधन झाले. उपचार सुरू असतानाच आज त्यांनी अखेरचा श्वास घेतला.

अंत्यदर्शन व अंत्यसंस्काराची वेळ
उद्या सकाळी ११ ते दुपारी २ या वेळेत मुंबईतील लोअर परळ येथे त्यांच्या पार्थिवाचे अंत्यदर्शन ठेवण्यात येणार आहे. त्यानंतर दुपारी ४ वाजता शिवाजी पार्क येथे अंत्यसंस्कार करण्यात येणार आहेत.