शाहू नगर ड्रग्स प्रकरणातील फरार आरोपी अबरार अखेर जळगाव पोलिसांच्या ताब्यात

शाहू नगर ड्रग्स प्रकरणातील फरार आरोपी अबरार अखेर जळगाव पोलिसांच्या ताब्यात
मालेगावात रंगेहाथ अटकेनंतर नाशिक कारागृहातून हस्तांतरण; २९ पर्यंत पोलीस कोठडी

जळगाव प्रतिनिधी : शहरातील शाहू नगर परिसरात उघडकीस आलेल्या एमडी ड्रग्स प्रकरणातील धागेदोरे मास्टर कॉलनीतील शेख अबरार शेख मुक्तार उर्फ अबरार जिलानी याच्यापर्यंत पोहोचताच तो जळगावातून पसार झाला होता. दुबईला पलायन केल्याचा संशय व्यक्त होत असताना हा तपास काहीसा थंडावला होता. मात्र, मालेगावात ड्रग्स विक्री करताना मालेगाव पोलिसांनी अबरारला रंगेहाथ पकडल्याने या प्रकरणाला नवे वळण मिळाले आहे. सध्या अबरारला जळगाव उपविभागीय पोलीस अधिकारी नितीन गणापुरे यांच्या पथकाने नाशिक कारागृहातून ताब्यात घेतले असून न्यायालयाने त्याला दि. २९ पर्यंत पोलीस कोठडी सुनावली आहे.

शहरातील शाहू नगर भागात काही महिन्यांपूर्वी शहर पोलिसांनी छापा टाकून साडेपाच लाख रुपयांचे एमडी ड्रग्स जप्त केले होते. या कारवाईत सर्फराज भिस्ती या ड्रग्स माफियाला अटक करण्यात आली होती. त्याच्या कसून चौकशीत या अवैध धंद्याचे धागेदोरे मास्टर कॉलनीत राहणाऱ्या शेख अबरार शेख मुक्तार उर्फ अबरार जिलानी याच्याशी जोडले गेले. मात्र, अटकेची चाहूल लागताच अबरार पसार झाला होता. गेल्या दहा महिन्यांपासून जळगाव पोलिसांकडून त्याचा शोध सुरू असतानाही तो हाती लागत नव्हता. अबरार दुबईत पळून गेल्याचा संशय व्यक्त करण्यात आल्याने तपासही काहीसा रखडला होता.

दरम्यान, मालेगाव पोलिसांनी चंदनपुरी रस्त्यावरील मन्सुरा कॉलेज परिसरात ड्रग्स विक्री करणाऱ्यांवर छापा टाकला. या कारवाईत शेख अबरार शेख मुक्तार उर्फ अबरार जिलानी (वय २७, रा. मास्टर कॉलनी, आक्सानगर) याला अटक करण्यात आली. त्याच्याकडून सुमारे ६ लाख रुपयांचे ६० ग्रॅम एमडी ड्रग्स जप्त करण्यात आले. त्याची पोलीस कोठडी संपल्यानंतर त्याला नाशिक येथील कारागृहात रवानगी करण्यात आली होती.

आंतरराज्यीय ड्रग्स जाळे उघड होण्याची शक्यता
जळगावमधील ड्रग्स कारवाईनंतर सुरत व भुसावळ येथेही संबंधित कारवाया झाल्या होत्या. या सर्व प्रकरणांचे कनेक्शन मास्टर कॉलनीतील अबरारशी असल्याचे निष्पन्न झाले होते. त्याच्या शोधासाठी गुजरात पोलिसांनीही मास्टर कॉलनीत भेट देऊन चौकशी केली होती, मात्र त्यांना अबरार मिळून आला नव्हता. अखेर मालेगावातील अटकेनंतर जळगाव उपविभागीय पोलीस अधिकारी नितीन गणापुरे यांच्या पथकाने त्याला नाशिक कारागृहातून ताब्यात घेतले आहे. सध्या त्याची सखोल चौकशी सुरू असून, या चौकशीत महाराष्ट्र व गुजरातमधील ड्रग्स माफियांचे आंतरराज्यीय कनेक्शन उघड होण्याची दाट शक्यता वर्तविण्यात येत आहे.