अमळनेरच्या केळी व्यापाऱ्याला ‘दामदुपटी’चे आमिष दाखवून ११ लाखांचा गंडा

अमळनेरच्या केळी व्यापाऱ्याला ‘दामदुपटी’चे आमिष दाखवून ११ लाखांचा गंडा

​पत्नीचे दागिने विकून उभी केली होती रक्कम; सात भामट्यांविरुद्ध जादूटोणा प्रतिबंधक कायद्यान्वये गुन्हा दाखल करण्याचे न्यायालयाचे आदेश

​अमळनेर | प्रतिनिधी
पैसे ‘दामदुपटीने’ वाढवून देण्याचे प्रलोभन दाखवून अमळनेर येथील एका केळी व्यापाऱ्याची तब्बल ११ लाख रुपयांची फसवणूक केल्याची धक्कादायक घटना उघडकीस आली आहे. भामट्यांनी जादूटोण्याचा बनाव रचून व्यापाऱ्याला लुटले असून, या प्रकरणी न्यायालयाने सात संशयित आरोपींविरुद्ध जादूटोणा प्रतिबंधक कायद्यांतर्गत गुन्हा दाखल करण्याचे कडक आदेश दिले आहेत. या घटनेमुळे अमळनेर परिसरात मोठी खळबळ उडाली आहे.

​मिळालेल्या माहितीनुसार, आसिफ छोटू बागवान असे फसवणूक झालेल्या व्यापाऱ्याचे नाव आहे. व्यवसायानिमित्त त्यांचे छत्रपती संभाजीनगर आणि अजिंठा परिसरात सतत येणे-जाणे होते. याच काळात त्यांची ओळख शेख मुजाहिद शेख मुकीत, अकबर मकबूल मेवाती, अब्दुल मुक्कीम अब्दुल खालिफ शेख, प्रकाश गायकवाड, नंदू जाधव, शाहरुख अब्दुल मुकीत आणि फिरोजखा भिकनखा मेवाती या सात जणांशी झाली. या संशयितांनी “आम्ही तुमचे पैसे दुपटीने वाढवून देऊ शकतो,” असा दावा करत बागवान यांचा विश्वास संपादन केला.

त्यांच्या आमिषाला बळी पडून बागवान यांनी आपल्या पत्नीचे सोन्याचे दागिने विकले आणि काही पैसे उसने घेऊन एकूण ११ लाख रुपयांची मोठी रक्कम उभी केली.

​१७ डिसेंबर २०२२ रोजी आरोपींनी बागवान यांना पैसे घेऊन बोलावले. एका ठिकाणी पूजेचा बनाव रचून सर्वत्र धूर करण्यात आला आणि बागवान यांना गुंगीसारख्या अवस्थेत घराबाहेर काढले. त्यांच्या हातात नोटांच्या पुड्या देऊन आरोपी त्यांना धुळे रोडवर सोडून पसार झाले. बागवान यांनी घरी जाऊन घाईघाईने त्या पुड्या तपासल्या असता, त्यात केवळ कागदाचे तुकडे आणि बनावट नोटा असल्याचे पाहून त्यांचे पाय खालची जमीनच सरकली. आपली फसवणूक झाल्याचे लक्षात येताच त्यांनी पोलिसांत धाव घेतली.

​पोलिसांनी संशयितांना ताब्यात घेतले असता, आरोपींनी फसवणुकीची कबुली देत ५ लाख रुपयांच्या मालमत्तेचे प्रतिज्ञापत्र आणि ६ लाख रुपयांचा धनादेश बागवान यांना दिला. मात्र, तपासात ही मालमत्ता आणि दिलेला धनादेश दोन्ही बनावट असल्याचे निष्पन्न झाले. अखेर कोणताही मार्ग न उरल्याने पीडित व्यापाऱ्याने ॲड. सलमान शाह यांच्यामार्फत न्यायालयात याचिका दाखल केली.

प्रकरणाची गंभीरता लक्षात घेऊन न्यायालयाने सर्व सातही आरोपींविरुद्ध जादूटोणा प्रतिबंधक कायद्यान्वये गुन्हा नोंदवण्याचे आदेश दिले आहेत. या प्रकरणाचा पुढील तपास पोलीस करत असून, अशा भूलथापांना नागरिकांनी बळी पडू नये, असे आवाहन करण्यात आले आहे.