आपत्तीग्रस्तांसाठी संजय गरुड यांचा मुख्यमंत्री देवेन्द्र फडणवीस यांना निधी सुपूर्द

आपत्तीग्रस्तांसाठी संजय गरुड यांचा मुख्यमंत्री देवेन्द्र फडणवीस यांना निधी सुपूर्द

ना.गिरीश महाजन यांच्या आवाहनाला प्रतिसाद

जळगाव : राज्यात अलीकडील अतिवृष्टी आणि पुरामुळे शेतकरी व सर्वसामान्य जनतेचे मोठे नुकसान झाले आहे. या संकटाच्या पार्श्वभूमीवर राज्याचे आपत्ती व्यवस्थापन व जलसंपदा मंत्री ना. गिरीशभाऊ महाजन यांनी समाजातील विविध घटकांना पूरग्रस्तांना मदत करण्याचे आवाहन केले होते.

या आवाहनाला प्रतिसाद देत भाजपचे ज्येष्ठ नेते व माजी जिल्हा परिषद सदस्य संजयदादा गरुड यांनी धुळे दौऱ्यावर आलेल्या मुख्यमंत्री ना. देवेंद्रजी फडणवीस यांना जळगाव विमानतळावर प्रत्यक्ष भेटून ₹७,१०,६६६ इतकी आर्थिक मदत मुख्यमंत्री सहाय्यता निधीसाठी धनादेशाद्वारे सुपूर्द केली. यावेळी ना. गिरीशभाऊ महाजन, जिल्ह्याचे पालकमंत्री ना. गुलाबराव पाटील, वस्त्रोद्योग मंत्री ना. संजय सावकारे, आमदार मंगेशदादा चव्हाण, आमदार किशोरआप्पा पाटील, आमदार अमोल जावळे, माजी मंत्री अरविंद देशमुख आदी मान्यवर उपस्थित होते.

ही मदत शेंदुर्णीतील “धी शेंदुर्णी सेकंडरी एज्युकेशन को-ऑफ सोसायटी”, “आचार्य गजाननराव गरुड पतसंस्था”, “शेंदुर्णी सहकारी फळ विक्री संस्था”, “श्री त्रिविक्रम महिला सहकारी दूध उत्पादक संस्था” तसेच वैयक्तिकरित्या संजयदादा गरुड व माजी जि.प. सदस्या सौ. सरोजिनी गरुड यांच्या वतीने देण्यात आली.

पूरग्रस्तांना तातडीने दिलासा मिळावा व शासनाचे मदतकार्य गतीमान व्हावे यासाठी संजयदादा गरुड यांनी मुख्यमंत्र्यांकडे विशेष मागणी केली. पिकांचे पंचनामे त्वरित करून नुकसानभरपाईचे वितरण लवकर व्हावे, अशीही विनंती त्यांनी केली.