फैजपूर नगराध्यक्षा पदी दामिनी सराफ यांनी स्वीकारला पदभार

फैजपूर नगराध्यक्षा पदी दामिनी सराफ यांनी स्वीकारला पदभार

फैजपूर (प्रतिनिधी) : ऐतिहासिक फैजपूर नगरपरिषदेच्या सार्वत्रिक निवडणुकीत भारतीय जनता पक्षाच्या दामिनी पवन सराफ यांनी विजय मिळवल्यानंतर नववर्षाच्या पहिल्याच दिवशी आपल्या लोकसेवेचा औपचारिक शुभारंभ केला. गुरुवारी टाळ-मृदंगाच्या गजरात सराफ गल्ली येथून निघालेल्या भव्य दिंडीत शेकडो समर्थक सहभागी झाले होते. या दिंडीनंतर नगरपरिषद सभागृहात आयोजित विशेष कार्यक्रमात त्यांनी नगराध्यक्षा पदाचा पदभार स्वीकारला.
नगरपरिषद प्रशासनाच्या वतीने मुख्याधिकारी अविनाश गांगोडे यांनी नवनिर्वाचित नगराध्यक्षा दामिनी सराफ तसेच सर्व नगरसेवक व नगरसेविकांचे पुष्पगुच्छ देऊन स्वागत केले व शुभेच्छा दिल्या. यावेळी फटाक्यांच्या आतषबाजीत व जल्लोषात फैजपूर शहरात आनंदाचे वातावरण निर्माण झाले होते. त्यानंतर नगराध्यक्षा दालनात नवनिर्वाचित नगरसेवक, नगरसेविका, नगरपालिकेचे अधिकारी-कर्मचारी, भाजप-शिवसेना युतीचे पदाधिकारी व कार्यकर्त्यांच्या उपस्थितीत दामिनी सराफ यांना सन्मानपूर्वक खुर्चीवर विराजमान करण्यात आले.
पदभार स्वीकारल्यानंतर आपल्या पहिल्याच प्रतिक्रियेत नगराध्यक्षा दामिनी सराफ यांनी सर्व नगरसेवक-नगरसेविकांना सोबत घेऊन शहराचा सर्वांगीण विकास साधण्याचा निर्धार व्यक्त केला. नागरिकांच्या मूलभूत गरजांमध्ये पाणीपुरवठ्याला सर्वोच्च प्राधान्य दिले जाईल. सध्या अवेळी होत असलेला पाणीपुरवठा नियमित करून महिलांना वेळेवर पाणी मिळेल, यासाठी पाणीपुरवठा विभागातील अधिकारी व कर्मचाऱ्यांसोबत स्वतंत्र बैठक घेण्यात येणार असल्याचे त्यांनी सांगितले.
याशिवाय वीजपुरवठा, गटारी, स्वच्छता व स्ट्रीट लाइट या नागरी सुविधांवर विशेष भर देण्यात येणार असून, बंद किंवा खराब असलेल्या दिवाबत्त्यांची दुरुस्ती तसेच गरजेनुसार नवीन दिवाबत्त्या बसविण्याचे नियोजन करण्यात येणार असल्याचेही त्यांनी स्पष्ट केले. स्वच्छ व सुंदर फैजपूर हे ध्येय डोळ्यांसमोर ठेवून काम केले जाईल, असा विश्वास त्यांनी व्यक्त केला.
शहरातील जनतेने आपल्यावर दाखविलेल्या विश्वासाला कोणताही तडा जाऊ देणार नाही. मतदानाच्या माध्यमातून मिळालेल्या आशीर्वादाचे ऋण कायम स्मरणात ठेवून काम करणार असल्याचे सांगत, जलसंपदा मंत्री ना. गिरीश महाजन, केंद्रीय मंत्री ना. रक्षा खडसे, पालकमंत्री ना. गुलाबराव पाटील, वस्त्रोद्योग मंत्री संजय सावकारे, आमदार अमोल जावळे, सर्व नगरसेवक-नगरसेविका व मुख्याधिकारी अविनाश गांगोडे यांच्या सहकार्याने फैजपूरच्या विकासासाठी कटिबद्ध राहणार असल्याचा आत्मविश्वास नगराध्यक्षा दामिनी सराफ यांनी व्यक्त केला.
याप्रसंगी सत्ताधारी नगरसेवक, भाजप-शिवसेना युतीचे पदाधिकारी, सराफ कुटुंबीय, कार्यकर्ते तसेच नगरपालिकेचे अधिकारी व कर्मचारी मोठ्या संख्येने उपस्थित होते.