चिन्मय मांडलेकर करतोय नेत्याची भूमिका येत आहे ‘सनी’; पहा ट्रेलर

दै. बातमीदार । २७ ऑक्टोबर २०२२ ।  सोशल मीडियावर #घरापासून_दूर चा जोरदार ट्रेंड मागील काही दिवसांपासून बऱ्याच कलाकारांचा दिसत आहे. यात हेमंत ढोमे, ललित प्रभाकर , क्षिती जोग, चिन्मय मांडलेकर अशा काही कलाकारांचा समावेश आहे. आता या हॅशटॅगमागे लपलेले गुपित सर्वांच्या समोर आले आहे. झिम्मा या सुपरहिट चित्रपटाचे दिग्दर्शक हेमंत ढोमे यांचा पुढचा चित्रपट ‘सनी’ प्रेक्षकांच्या भेटीला येणार आहे. या चित्रपटाच्या टीझरला चांगला प्रतिसाद मिळाल्यानंतर या चित्रपटातीळ एकएक भूमिका आता बाहेर येऊ लागली आहे.

या चित्रपटातील विश्वजित मोहिते पाटील या कार्यसम्राट आमदाराची व्यक्तिरेखा समोर आली असून चिन्मय मांडलेकर यांनी ही भूमिका साकारली आहे. व्यक्तिरेखेची झलक पाहता विश्वजित अतिशय करारी, शिस्तप्रिय दिसत आहेत. घरात असलेला त्यांचा दबदबाही यातून अधोरेखित होत असून सनी आणि त्यांच्या नात्यात कटुता असल्याचे भासतेय. आता विश्वजित आणि सनीमध्ये नेमका कशावरून हा दुरावा आलाय, हे चित्रपट पाहिल्यावरच समजेल. चिन्मय यांचा फ्रेश आणि वेगळा लुक लक्ष वेधुन घेतोय, त्यामुळे उत्सुकता अजुन वाढली आहे. सुपरहिट चित्रपट झिम्माच्या टिमची ‘सनी’ ही पुढील भेट आहे.

क्रेझी फ्यु फिल्म्स, प्लॅनेट मराठी, क्रिएटिव्ह वाईब प्रॉडक्शन प्रस्तुत, चलचित्र कंपनी निर्मित ‘सनी’ हा सिनेमा १८ नोव्हेंबरला चित्रपटगृहात प्रदर्शित होणार आहे. इरावती कर्णिक लिखित या चित्रपटात ‘सनी’ची भूमिका ललित प्रभाकरने साकारली आहे. अक्षय विलास बर्दापूरकर, क्षिती जोग, विराज गवस व उर्फी काझमी हे सिनेमाचे निर्माते असून संतोष खेर, तेजस्विनी पंडित सह-निर्माते आहेत.