निसर्गाच्या साहित्यातून फुलली सर्जनशीलता; उपक्रमशील कलाशिक्षक सुनील दाभाडे यांचा नाविन्यपूर्ण उपक्रम

जळगांव(प्रतिनिधी)- येथील मानव सेवा मंडळ संचलित प्राथमिक विद्या मंदिर ,जळगांव येथे पुस्तकी ज्ञानासोबतच विद्यार्थ्यांच्या कल्पनाशक्तीला वाव देण्यासाठी उपक्रमशील शिक्षक सुनिल दाभाडे यांनी एक अनोखा उपक्रम राबवला आहे. ‘पान, फुले आणि काड्या’ यांसारख्या नैसर्गिक साहित्याचा वापर करून चित्रकला कशी साकारता येते, याचे धडे त्यांनी विद्यार्थ्यांना दिले. या उपक्रमातून विद्यार्थ्यांनी निसर्गाच्या सानिध्यात राहून आपली कलात्मकता सिद्ध केली आहे.

उपक्रमाचे स्वरूप
नेहमीचे कागद आणि रंग बाजूला ठेवून, सुनिल दाभाडे यांनी विद्यार्थ्यांना परिसरात पडलेली वाळलेली पाने, विविध रंगांची फुले आणि लहान-मोठ्या काड्या गोळा करण्यास सांगितले. या टाकाऊ व नैसर्गिक वस्तूंपासून पानांचा वापर करून प्राणी आणि पक्ष्यांच्या आकृती तयार करणे. काड्यांच्या मदतीने घरांचे आणि झाडांचे सांगाडे बनवणे. फुलांच्या पाकळ्यांपासून रंगीत नक्षीकाम करणे.

विद्यार्थ्यांमध्ये उत्साह
या नाविन्यपूर्ण प्रयोगामुळे विद्यार्थी भारावून गेले होते. ओसाड वाटणाऱ्या काड्या आणि वाळलेल्या पानांपासून इतकी सुंदर चित्रे तयार होऊ शकतात, याचा अनुभव विद्यार्थ्यांनी पहिल्यांदाच घेतला. यामुळे मुलांची निरीक्षण शक्ती आणि सर्जनशीलता वाढण्यास मदत झाली आहे.
“शिक्षण हे केवळ चार भिंतींच्या आतले नसावे. निसर्गात उपलब्ध असलेल्या साहित्यातून जेव्हा मुले काहीतरी नवीन घडवतात, तेव्हा त्यांचा आत्मविश्वास खऱ्या अर्थाने वाढतो. हाच या उपक्रमाचा मुख्य उद्देश आहे.”
-सुनिल दाभाडे (उपक्रमशील कलाशिक्षक)

कौतुकाचा वर्षाव
सुनिल दाभाडे सरांच्या या उपक्रमाचे संस्थेचे अध्यक्ष डॉ. आर.एस.डाकलिया ,मानद सचिव विश्वनाथ जोशी, सर्व पदाधिकारी व सदस्य तसेच शाळेच्या मुख्याध्यापिका- माया अंबटकर ,बालवाडी विभागाचा मुख्याध्यापिका- मुक्ता पाटील ,माध्यमिक मुख्याध्यापिका- प्रतिभा सुर्यवंशी, सर्व सहकारी शिक्षक व शिक्षकेत्तर कर्मचारी ,पालक यांन कौतुक केले. नैसर्गिक साधनांचा वापर केल्यामुळे पर्यावरणाप्रती मुलांमध्ये जागरूकता निर्माण होत असून, कलेकडे पाहण्याचा एक नवीन दृष्टिकोन त्यांना मिळाला आहे, अशा प्रतिक्रिया प्राथमिक मुख्याध्यापिका माया अंबटकर यांनी दिल्या आहेत.