फैजपूरच्या ‘प्रतिजेजुरी’त खंडोबारायाच्या यात्रोत्सवाला उत्साहात प्रारंभ

फैजपूरच्या ‘प्रतिजेजुरी’त खंडोबारायाच्या यात्रोत्सवाला उत्साहात प्रारंभ

​२०० वर्षांची परंपरा; खान्देशासह राज्यभरातून लाखो भाविकांची उपस्थिती

​फैजपूर | प्रतिनिधी
खान्देशवासीयांचे आराध्य दैवत आणि ‘प्रतिजेजुरी’ म्हणून ओळखल्या जाणाऱ्या फैजपूर येथील खंडोबा देवस्थानचा वार्षिक यात्रोत्सव आजपासून (२ मार्च) मोठ्या उत्साहात सुरू झाला आहे. पुढील आठ दिवस चालणाऱ्या या सोहळ्यासाठी फैजपूर नगरी सजली आहे. महाराष्ट्र, मध्यप्रदेश आणि उत्तर प्रदेशातून लाखो भाविक दाखल होत आहेत. आज सकाळी ‘येळकोट येळकोट जय मल्हार ‘च्या जयघोषात भंडारा उधळून यात्रेचा शुभारंभ करण्यात आला.

देवस्थानाला २०० वर्षांची परंपरा
​हे देवस्थान सुमारे २०० वर्षांपूर्वीचे असून, येथील खंडोबारायाची मूर्ती इंदूरच्या होळकर घराण्याची देणगी असल्याचे मानले जाते. या यात्रेचे खास वैशिष्ट्य म्हणजे येथे होणारे कर्णछेदनासारखे धार्मिक विधी. या सोहळ्याचे नियोजन गादीपती महामंडलेश्वर पुरुषोत्तमदास महाराज आणि पवनदासमहाराज यांच्या मार्गदर्शनाखाली करण्यात आले आहे. या सोहळ्याला अयोध्या येथील रामजन्मभूमी तीर्थक्षेत्राचे अध्यक्ष महंत नृत्यगोपालदास महाराज यांनीही आशीर्वाद दिले आहेत.

खाद्य पदार्थांसह विविध वस्तूंचे स्टॉल ; चोख बंदोबस्त
​यात्रेनिमित्त परिसरात मोठी दुकाने, खाद्यपदार्थांचे स्टॉल, पाळणे आणि करमणुकीच्या साधनांची रेलचेल असून आर्थिक उलाढालही मोठ्या प्रमाणावर होत आहे. भाविकांच्या सुरक्षेसाठी पोलीस प्रशासन आणि आरोग्य विभाग सज्ज आहे. सहाय्यक पोलीस निरीक्षक रामेश्वर मोताळे यांच्या नेतृत्वाखाली पोलिसांचा मोठा फौजफाटा तैनात करण्यात आला असून, डॉक्टरांचे पथकही २४ तास सेवेत आहे. फाल्गुन शुद्ध पौर्णिमेच्या मुहूर्तावर भरणाऱ्या या यात्रेने फैजपूरमध्ये सध्या आध्यात्मिक आणि सामाजिक चैतन्य निर्माण झाले आहे.