गुगलच्या सीईओचे कर्मचाऱ्याना मेल ; १२ हजारांना दिला डच्यु !

दै. बातमीदार । १७ फेब्रुवारी २०२३ । जगभरात गेल्या दोन वर्षाआधी कोरोनाचे मोठे संकट आल्यानंतर अनेक कंपन्यांनी आपले कर्मचारीची मोठी कपात केली होती, पण त्यानंतर अनेक कंपन्यांनी कर्मचाऱ्याना पुन्हा रुजू देखील केले होते. त्यानंतर भरपूर मोठमोठ्या कंपनीमधून कर्मचाऱ्याना अचानक नारळ देत आहे. नुकतेच गुगल ची पॅरेंट कंपनी अल्फाबेट ने 12 हजार कर्मचाऱ्यांना कामावरून काढून टाकण्याची घोषणा केली आहे. या संदर्भात गुगलचे सीईओ सुंदर पिचाई यांनी कर्मचाऱ्यांना ई-मेल पाठवून माहिती दिली आहे. याआधी मायक्रोसॉफ्टने 10,000 आणि ॲमेझॉनने 10 हजार लोकांना कामावरून काढून टाकल्याचे वृत्त समोर आले आहे.

गुगलचीची मूळ कंपनी अल्फाबेटने 20 जानेवारी रोजी 12,000 नोकर्‍या कमी करण्याची घोषणा केली आहे. ही संख्या एकूण जागतिक कर्मचार्‍यांपैकी 6 टक्के आहे. या कपातीचा जागतिक स्तरावर आणि संपूर्ण कंपनीतील नोकऱ्यांवर विपरित परिणाम होईल.

गुगलचे मुख्य कार्यकारी अधिकारी सुंदर पिचाई यांनी शुक्रवारी एका ईमेलमध्ये कर्मचाऱ्यांना सांगितले की, आम्हाला घ्यावे लागत असलेल्या निर्णयांची संपूर्ण जबाबदारी मी घेत आहे. आमच्या ध्येयाची ताकद, आमची उत्पादने आणि सेवांचे मूल्य आणि आमच्या सुरुवातीच्या गुंतवणुकीमुळे मला आमच्यासमोरील मोठ्या संधीबद्दल खात्री आहे.

गूगलने म्हटले की, कामावरून कमी केल्याचा तात्काळ परिणाम अमेरिकन कर्मचाऱ्यांवर होणार आहे. सुंदर पिचाई म्हणाले की, कंपनी कर्मचार्‍यांना संपूर्ण नोटीस कालावधी म्हणजेच 60 दिवसांची रक्कम देईल. नोव्हेंबर 2022 मध्ये हा अहवाल समोर आला होता, ज्यामध्ये असे सांगण्यात आले होते की गूगल सर्वात वाईट कामगिरी करणाऱ्या 6 टक्के कर्मचाऱ्यांची ओळख पटवत आहे. आता गुगलने त्या सर्व 6 टक्के कर्मचाऱ्यांना काढून टाकण्याची घोषणा केली आहे.

गूगलमध्ये 2021 च्या अखेरीस 1.56 लाख लोकांना रोजगार मिळाला आहे. गुगलच्या आधी या आठवड्यात मायक्रोसॉफ्टने सुमारे 10,000 कर्मचाऱ्यांना काढून टाकण्याची घोषणा केली आहे. तर त्याआधी अॅमेझॉनने 10,000 लोकांना बाहेर काढण्याचीही चर्चा केली होती. याशिवाय मेटा आणि ट्विटरनेही अलिकडच्या काही महिन्यांत त्यांचे कर्मचारी कमी केले आहेत.