भिकामचंद जैन व वाघुळदे नगरात रस्ता काँक्रीटीकरणाचा शुभारंभ

भिकामचंद जैन व वाघुळदे नगरात रस्ता काँक्रीटीकरणाचा शुभारंभ

आमदार राजूमामा भोळे यांच्या मार्गदर्शनाखाली विकासकामांना गती
​
​जळगाव | प्रतिनिधी
जळगाव महानगरपालिकेच्या प्रभाग क्रमांक ८ अंतर्गत येणाऱ्या भिकामचंद जैन नगर आणि वाघुळदे नगर परिसरातील नागरिकांसाठी दिलासादायक बातमी आहे. गेल्या अनेक दिवसांपासून प्रलंबित असलेल्या रस्ता काँक्रीटीकरणाच्या कामाला अखेर प्रत्यक्ष सुरुवात झाली असून, विकासाच्या दिशेने प्रशासनाने एक महत्त्वाचे पाऊल टाकले आहे.

जळगाव शहराचे आमदार राजूमामा भोळे यांच्या मार्गदर्शनाखाली आणि स्थानिक लोकप्रतिनिधींच्या सातत्यपूर्ण पाठपुराव्यामुळे या कामाला मंजुरी मिळाली असून, यामुळे परिसरातील रस्ते आता चकाचक होणार आहेत.
​या विकासकामासाठी सागर जिजाबराव पाटील यांनी केलेल्या पाठपुराव्याला यश आले असून, परिसरात समाधान व्यक्त केले जात आहे. या कामाचे अधिकृत उद्घाटन आमदार राजूमामा भोळे यांच्या मार्गदर्शनाखाली पार पडले. या सोहळ्याला नवनियुक्त महापौर दीपमाला काळे आणि उपमहापौर मनोज चौधरी यांची प्रमुख उपस्थिती होती. प्रभाग ८ मधील नगरसेवक कविता सागर पाटील, नरेंद्र आत्माराम पाटील, अमर जैन आणि मानसी भोईटे यांच्या संयुक्त प्रयत्नांतून या कामाला मूर्त स्वरूप प्राप्त झाले आहे.

​नगरसेविका कविता सागर पाटील यांच्या हस्ते विधिवत कुदळ मारून या रस्ता काँक्रीटीकरणाचा शुभारंभ करण्यात आला. नवीन कार्यकाळाच्या सुरुवातीलाच विकासकामांचा धडाका लावल्याने, “निवडून दिलेले नगरसेवक कामाची पोचपावती देत आहेत,” असा विश्वास प्रभागातील जनतेतून व्यक्त होत आहे. दीर्घकाळापासून रस्त्यांच्या दुरवस्थेमुळे आणि खड्ड्यांमुळे त्रस्त असलेल्या नागरिकांना या काँक्रीटीकरणामुळे मोठा दिलासा मिळणार असून, ये-जा करण्यासाठी सुरक्षित व सुकर मार्ग उपलब्ध होणार आहे.

​उद्घाटन प्रसंगी बोलताना नगरसेविका कविता पाटील म्हणाल्या, “प्रभागातील प्रत्येक नागरिकाला मूलभूत सुविधा सक्षमपणे पुरवणे हेच आमचे प्राथमिक ध्येय आहे. आमदार राजूमामा भोळे यांच्या खंबीर नेतृत्वाखाली यापुढेही प्रभागातील प्रलंबित विकासकामांची मालिका अशीच सुरू राहील.” या कार्यक्रमाला परिसरातील नागरिक, विविध पदाधिकारी आणि कार्यकर्ते मोठ्या संख्येने उपस्थित होते.