माजी मंत्री एकनाथराव खडसे यांच्या मुक्ताई बंगल्यातील घरफोडी उघड ; तिघांना अटक 

माजी मंत्री एकनाथराव खडसे यांच्या मुक्ताई बंगल्यातील घरफोडी उघड ; तिघांना अटक 

6 लाख 21 हजारांचा मुद्देमाल जप्त 

जळगाव : शिवराम नगर परिसरातील माजी मंत्री तथा आमदार एकनाथराव खडसे यांच्या मुक्ताई बंगल्यात झालेल्या घरफोडी प्रकरणाचा छडा लावण्यात रामानंद नगर पोलिसांना मोठे यश मिळाले आहे. पोलिसांनी या प्रकरणातील तीन आरोपींना अटक करून तब्बल ६ लाख २१ हजार रुपयांचा सोन्या-चांदीचा मुद्देमाल हस्तगत केला असून मुख्य आरोपी अजूनही फरार आहेत.

घटना दिनांक २७ ऑक्टोबरच्या रात्रीपासून २८ ऑक्टोबरच्या सकाळपर्यंतची असून, मुक्ताई बंगला बंद असताना अज्ञात चोरट्यांनी कुलूप तोडून आत प्रवेश केला आणि घरातील सोन्या-चांदीचे दागिने व रोख रक्कम असा मिळून सुमारे ६ लाख ७० हजार रुपयांचा मुद्देमाल लंपास केला होता. या प्रकरणी चेतन सुरेश देशमुख यांच्या फिर्यादीवरून रामानंद नगर पोलिस ठाण्यात गुन्हा दाखल करण्यात आला.

घटनेचा तपास पोलिस अधीक्षक डॉ. महेश्वर रेड्डी, अपर पोलिस अधीक्षक अशोक नखाते आणि उपविभागीय अधिकारी नितीन गणापुरे यांच्या मार्गदर्शनाखाली पोलिस निरीक्षक राजेंद्र गुंजाळ व स्थानिक गुन्हे शाखेचे निरीक्षक राहुल गायकवाड यांच्या नेतृत्वाखाली सुरू झाला. दरम्यान, मिळालेल्या गोपनीय माहितीनुसार पोलिसांना गुन्ह्यात वापरलेली सुजुकी बर्गमन दुचाकी (MH-19-ER-5539) हस्तगत झाली. या वाहनाच्या चौकशीतून आरोपींचा थांगपत्ता लागला.

त्यावरून पोलिसांनी जियाउद्दीन हुस्नोददीन शेख (३९, रा. मास्टर कॉलनी, जळगाव) याला अटक केली. पुढील तपासात त्याने चोरीचा मुद्देमाल उल्हासनगर येथील सोनाराकडे विकल्याचे कबूल केले. त्यानंतर पोलिसांनी मुंबई गाठून चिराग इकबाल सैय्यद (२२, रा. उल्हासनगर) व कैलास हिराचंद खंडेलवार (४८, रा. कल्याण) या दोघांना अटक केली. त्यांच्या ताब्यातून सोन्या-चांदीचे दागिने व मूर्ती असा ६ लाख २१ हजार रुपयांचा मुद्देमाल जप्त करण्यात आला.

हस्तगत मुद्देमालात ३१.९७० ग्रॅम सोन्याचे दागिने — लगड, अंगठ्या, चैन, कानातील रिंग — तसेच २१७ ग्रॅम वजनाची चांदीची गणपती मूर्ती यांचा समावेश आहे. मुख्य आरोपी मोहम्मद बिलाल उर्फ बिल्ला अब्दुल करीम चौधरी, एजाज अहमद उर्फ सलीम अब्दुल चौधरी आणि ‘बाबा’ (पूर्ण नाव अज्ञात) हे तिघे अद्याप फरार असून, हे सर्व उल्हासनगर-मुंबई परिसरातील आहेत. त्यांच्याविरुद्ध मुंबई व गुजरातमधील विविध पोलीस ठाण्यांत २० हून अधिक घरफोडी व चोरीचे गुन्हे नोंद असल्याचे समोर आले आहे.

रामानंद नगर पोलीस स्टेशन व स्थानिक गुन्हे शाखेच्या संयुक्त पथकाने अत्यंत कौशल्यपूर्ण तपास करून हा गुन्हा उघडकीस आणला. या कारवाईत पोलीस नाईक हेमंत कळसकर व पोलीस कर्मचारी गोविंदा पाटील यांनी मोलाची भूमिका बजावली. तसेच सहाय्यक पोलीस उपनिरीक्षक सचिन रणेशवरे, सुशिल चौधरी, जितेंद्र राजपूत, विनोद सुर्यवंशी, तसेच गुन्हे शाखेचे शरद बागल, अक्रम शेख आणि प्रितम पाटील आदींचा समावेश होता. पुढील तपास पोलीस उपनिरीक्षक सचिन रणेशवरे करीत आहेत.