जळगाव विद्यापीठाच्या ४४ विद्यार्थ्यांना ‘मॅक्लिओड्स फार्मा’मध्ये नोकरीची संधी

जळगाव विद्यापीठाच्या ४४ विद्यार्थ्यांना ‘मॅक्लिओड्स फार्मा’मध्ये नोकरीची संधी

​परिसर मुलाखतीत १०६ विद्यार्थ्यांचा सहभाग; कुलगुरूंकडून यशस्वी विद्यार्थ्यांचे अभिनंदन

​जळगाव | प्रतिनिधी
कवयित्री बहिणाबाई चौधरी उत्तर महाराष्ट्र विद्यापीठातील केंद्रीय प्रशिक्षण व नियुक्ती कक्षाच्या माध्यमातून (Central Placement Cell) विद्यार्थ्यांच्या करिअरला मोठी गती मिळाली आहे. नामांकित औषधनिर्मिती कंपनी ‘मॅक्लिओड्स फार्मास्युटिकल्स लिमिटेड’ यांच्या वतीने आयोजित परिसर मुलाखतीतून (Campus Interview) विद्यापीठ आणि संलग्न महाविद्यालयांतील एकूण ४४ विद्यार्थ्यांची निवड करण्यात आली आहे. विशेष म्हणजे, या सर्व विद्यार्थ्यांना निवडीनंतर तत्काळ नियुक्तीपत्रे प्रदान करण्यात आली आहेत.
​विद्यापीठाच्या सिनेट सभागृहात २८ फेब्रुवारी रोजी ही निवड प्रक्रिया पार पडली. यात वाणिज्य, विज्ञान (रसायनशास्त्र, सूक्ष्मजीवशास्त्र, जैवतंत्रज्ञान), बी.फार्मसी, एम.फार्मसी, आयटीआय आणि यांत्रिकी अभियांत्रिकी अशा विविध शाखांतील १०६ विद्यार्थ्यांनी लेखी परीक्षा आणि मुलाखत दिली होती. कंपनीचे प्रतिनिधी हिरेन पटेल आणि राजकुमार यांनी विद्यार्थ्यांची निवड केली. यामध्ये सर्वाधिक २८ विद्यार्थी बी.फार्मसी शाखेचे आहेत. या उपक्रमाचे यशस्वी नियोजन प्रा. उज्वल पाटील, प्रा. रामेश्वर चव्हाण आणि प्लेसमेंट अधिकारी सोनाली दायमा यांनी केले. या यशाबद्दल कुलगुरू प्रा. व्ही. एल. माहेश्वरी, प्र-कुलगुरू प्रा. एस. टी. इंगळे व कुलसचिव डॉ. विनोद पाटील यांनी विद्यार्थ्यांचे कौतुक केले आहे.
​२. बाबा आमटेंचे कार्य म्हणजे मानवतेचा अद्वितीय संदेश – प्रा. म. सु. पगारे
​विद्यापीठाच्या भाषा अभ्यास प्रशाळेत ‘समाजसेवक डॉ. बाबा आमटे’ यांच्या जीवनचरित्रावर व्याख्यान
​जळगाव | प्रतिनिधी
“ज्या काळात कुष्ठरोगाकडे सामाजिक शाप म्हणून पाहिले जात होते, त्या काळात बाबा आमटे यांनी ‘आनंदवन’ उभारून कुष्ठरोग्यांच्या आयुष्यात प्रकाशाची पेरण केली. त्यांचे कार्य हे संपूर्ण जगासाठी करुणा आणि मानवतेचा अद्वितीय संदेश आहे,” असे प्रतिपादन भाषा अभ्यास प्रशाळेचे संचालक प्रा. डॉ. म. सु. पगारे यांनी केले. कवयित्री बहिणाबाई चौधरी उत्तर महाराष्ट्र विद्यापीठातील भाषा अभ्यास प्रशाळा व संशोधन केंद्रात ‘प्राध्यापक प्रबोधिनी’ अंतर्गत आयोजित व्याख्यानात ते बोलत होते.
​कार्यक्रमात मुख्य वक्त्या म्हणून इंग्रजी विषयाच्या शिक्षण सहयोगी प्रीती मनुचारी यांनी बाबा आमटे यांच्या जीवनप्रवासावर प्रकाश टाकला. बाबा आमटे आणि त्यांच्या पत्नी डॉ. साधना आमटे यांनी कुष्ठरोग्यांविरुद्धचा सामाजिक लढा कसा यशस्वी केला, याचे प्रभावी सादरीकरण त्यांनी केले. याप्रसंगी झालेल्या चर्चेत डॉ. दीपक खरात, डॉ. भारती सोनवणे आणि इतर प्राध्यापकांनी सहभाग घेऊन डॉ. अभय बंग व डॉ. राणी बंग यांच्या गडचिरोलीतील कार्याचाही गौरवपूर्ण उल्लेख केला. पल्लवी बारी यांनी सूत्रसंचालन केले, तर खेमराज पाटील यांनी आभार मानले.
​३. जळगाव विद्यापीठाच्या नाट्यशास्त्र विभागाचा राज्यस्तरावर डंका; ‘हस्ती-जिभाऊ करंडक’वर नाव कोरले
​नंदुरबार येथील स्पर्धेत ‘ऑलमोस्ट यू डाय’ एकांकिका ठरली अव्वल; दिग्दर्शन, संगीत आणि अभिनयातही पुरस्कारांची लयलूट
​जळगाव | प्रतिनिधी
नंदुरबार येथे आयोजित अत्यंत प्रतिष्ठेच्या राज्यस्तरीय “हस्ती-जिभाऊ करंडक” एकांकिका स्पर्धेत कवयित्री बहिणाबाई चौधरी उत्तर महाराष्ट्र विद्यापीठाच्या नाट्यशास्त्र विभागाने घवघवीत यश संपादन केले आहे. विद्यापीठाच्या विद्यार्थ्यांनी सादर केलेल्या “ऑलमोस्ट यू डाय” या एकांकिकेने आपल्या प्रभावी सादरीकरणाने प्रेक्षकांची आणि परीक्षकांची मने जिंकत प्रथम क्रमांकाचा करंडक पटकावला.
​गाडगेबाबा शैक्षणिक सांस्कृतिक सेवा मंडळ आणि रोटरी क्लब ऑफ नंदनगरी यांच्या संयुक्त विद्यमाने ही स्पर्धा आयोजित करण्यात आली होती. या यशात वैयक्तिक पुरस्कारांचाही मोठा वाटा आहे. समाधान मुर्तडक यांना ‘उत्कृष्ट दिग्दर्शनाचा’ प्रथम पुरस्कार मिळाला, तर रोहित सरोदे आणि भूषण सोनवणे यांना ‘सर्वोत्कृष्ट संगीताचा’ बहुमान मिळाला. अभिनयाच्या जोरावर सतीश वराडे यांनी पुरुष गटात द्वितीय क्रमांक मिळवला. विद्यापीठाच्या या यशामुळे सांस्कृतिक वर्तुळात कौतुकाचा वर्षाव होत आहे. कुलगुरू प्रा. व्ही. एल. माहेश्वरी यांनी या विजेत्या चमूचे अभिनंदन करून त्यांना पुढील वाटचालीस शुभेच्छा दिल्या आहेत.