आरटीओ फिटनेस व लायसन्स चाचणी ट्रॅकवरील सुविधांचा अभाव; मनसेचे निवेदन

आरटीओ फिटनेस व लायसन्स चाचणी ट्रॅकवरील सुविधांचा अभाव; मनसेचे निवेदन

पाणी, शेड व स्वच्छतागृहाची मागणी; ८ दिवसांत तोडगा न काढल्यास आंदोलनाचा इशारा

जळगाव : प्रतिनिधी
जळगाव शहरापासून सुमारे चार किलोमीटर अंतरावर असलेल्या आरटीओ विभागाच्या वाहन फिटनेस टेस्टिंग ट्रॅक तसेच कायमस्वरूपी लायसन्स चाचणी ट्रॅकवर मूलभूत सुविधांचा अभाव असल्याने नागरिकांना मोठ्या अडचणींचा सामना करावा लागत आहे. या समस्या तातडीने सोडवाव्यात, या मागणीसाठी महाराष्ट्र नवनिर्माण सेनेतर्फे प्रादेशिक परिवहन अधिकाऱ्यांना निवेदन देण्यात आले. मागण्या मान्य न झाल्यास तीव्र आंदोलन छेडण्याचा इशाराही देण्यात आला.
निवेदनात नमूद करण्यात आले आहे की, जळगाव जिल्ह्यात सध्या उन्हाची तीव्रता मोठ्या प्रमाणात वाढली आहे. या ट्रॅकवर दररोज शेकडो वाहनचालक व नागरिक विविध कामांसाठी येत असतात. मात्र त्या ठिकाणी पिण्याच्या पाण्याची व्यवस्था नसल्याने नागरिकांची गैरसोय होत आहे. तसेच नागरिकांना बसण्यासाठी सावलीची शेड किंवा प्रतीक्षागृह नसल्याने कडक उन्हात तासनतास उभे राहावे लागत असून त्यामुळे आरोग्याचा धोका निर्माण होत आहे.
याशिवाय महिला व पुरुषांसाठी स्वच्छतागृहाचीही कोणतीही सुविधा उपलब्ध नसल्याने नागरिकांना मोठ्या अडचणींना सामोरे जावे लागत आहे. हा परिसर शहरापासून लांब असल्यामुळे आपत्कालीन परिस्थितीत किंवा साध्या गरजांसाठीही नागरिकांना शहरात जावे लागते.
या पार्श्वभूमीवर ट्रॅकवर कायमस्वरूपी पिण्याच्या पाण्याची व्यवस्था करावी, नागरिकांसाठी प्रशस्त व सावलीची शेड उभारावी तसेच तातडीने फिरते किंवा कायमस्वरूपी स्वच्छतागृह उपलब्ध करून द्यावे, अशी मागणी मनसेतर्फे करण्यात आली आहे.
येत्या आठ दिवसांत या सुविधा उपलब्ध करून द्याव्यात, अन्यथा महाराष्ट्र नवनिर्माण सेना आपल्या पद्धतीने तीव्र आंदोलन छेडेल, असा इशारा यावेळी देण्यात आला.
निवेदन देताना जिल्हाध्यक्ष ॲड. जमील देशपांडे, उपमहानगराध्यक्ष श्रीकृष्ण मेंगडे, राजेंद्र निकम, ललित शर्मा, खुशाल ठाकूर, युसुफ खाटीक, अश्फाक शहा, आली खाटीक आदी उपस्थित होते.