रावेर–यावल मतदारसंघातील मका खरेदीचे उद्दिष्ट वाढवा : आमदार अमोल जावळे

रावेर–यावल मतदारसंघातील मका खरेदीचे उद्दिष्ट वाढवा : आमदार अमोल जावळे
रावेर प्रतिनिधी : खरीप पणन हंगाम २०२४–२५ अंतर्गत रावेर–यावल विधानसभा क्षेत्रातील शेतकऱ्यांच्या मका खरेदीसंदर्भातील अडचणी लक्षात घेऊन आमदार अमोल जावळे यांनी राज्याचे सहकार व पणन मंत्री जयकुमार रावल यांची भेट घेत मका खरेदीचे उद्दिष्ट तातडीने वाढविण्याची मागणी केली आहे.
सध्या शासनाच्या किमान आधारभूत किंमत योजनेअंतर्गत मका खरेदी प्रक्रिया सुरू आहे. रावेर–यावल मतदारसंघात यंदा मका पिकाखालील क्षेत्रात मोठी वाढ झाली असून उत्पादनही वाढले आहे. परिणामी शेतकऱ्यांची नोंदणी संख्या लक्षणीयरीत्या वाढली आहे.
आमदार जावळे यांनी सादर केलेल्या निवेदनात नमूद केले आहे की, खरेदी केंद्रांवरील मर्यादित उद्दिष्ट आणि निश्चित वेळापत्रकामुळे अनेक शेतकरी प्रतीक्षेत आहेत. हमीभावापेक्षा कमी दराने खासगी व्यापाऱ्यांना मका विक्री करण्याची वेळ शेतकऱ्यांवर येत असून त्यामुळे आर्थिक नुकसान होण्याची शक्यता आहे.
या पार्श्वभूमीवर रावेर–यावल विधानसभा क्षेत्रासाठी स्वतंत्र वाढीव मका खरेदी उद्दिष्ट मंजूर करावे, खरेदी कालावधी वाढवावा तसेच नोंदणीकृत सर्व पात्र शेतकऱ्यांचा मका हमीभावाने खरेदी करण्याचे स्पष्ट निर्देश द्यावेत, अशी मागणी करण्यात आली आहे.
शेतकऱ्यांच्या हितासाठी शासनाने तातडीने सकारात्मक निर्णय घ्यावा, अशी अपेक्षा आमदार अमोल जावळे यांनी व्यक्त केली.