MSRTC च्या १३ ‘शिवाई ई-बस’चे पालकमंत्र्यांच्याहस्ते लोकार्पण

MSRTC च्या १३ ‘शिवाई ई-बस’चे पालकमंत्र्यांच्याहस्ते लोकार्पण

जळगाव प्रतिनिधी जिल्ह्याचे पालकमंत्री गुलाबराव पाटील यांच्या हस्ते आज १३ वातानुकूलित ‘शिवाई’ इलेक्ट्रिक बसच्या लोकार्पण सोहळ्याचा थाटात कार्यक्रम पार पडला. यावेळी आमदार राजू मामा भोळे जिल्हाधिकारी डॉ. आयुष प्रसाद, जिल्हा परिषदेच्या मुख्य कार्यकारी अधिकारी मीनल करणवाल उपस्थित होते.

नवनवीन तंत्रज्ञानाचा वापर करून सार्वजनिक वाहतूक व्यवस्था अधिक सोयीची, पर्यावरणपूरक आणि प्रवाशांसाठी आरामदायक व्हावी, या उद्देशाने ‘शिवाई’ इलेक्ट्रिक बस सेवा सुरू करण्यात आली आहे. सर्व बस वातानुकूलित असून प्रवाशांसाठी “पुष्पक सीट” नावाची आलिशान आसनव्यवस्था उपलब्ध आहे, ज्यामुळे प्रवासाचा अनुभव अधिक सुखद व दर्जेदार होणार आहे.

लोकार्पण सोहळ्यात मान्यवरांनी बसमध्ये बसून प्रत्यक्ष अनुभव घेतला आणि प्रवासाच्या सोयीबाबत माहिती घेतली. पालकमंत्री गुलाबराव पाटील यांनी सांगितले की, ही सेवा फक्त पर्यावरणपूरक नाही तर ग्रामीण व शहरी भागातील प्रवाशांना नवी सुविधा देणारी क्रांतिकारी पायरी ठरेल.

जिल्हाधिकारी डॉ. आयुष प्रसाद यांनी सांगितले की, हळूहळू जिल्ह्यातील इतर मार्गांवरही अशाच स्मार्ट आणि हरित बससेवा सुरू करण्याचा मानस आहे. मुख्य कार्यकारी अधिकारी मीनल करणवाल यांनी उपक्रमाला जिल्हा परिषदेचा संपूर्ण पाठिंबा असल्याचे नमूद केले, तर आमदार राजू मामा भोळे यांनी ही सुविधा सर्वसामान्य जनतेपर्यंत पोहोचावी, यासाठी प्रयत्नशील राहण्याचे आश्वासन दिले.

‘शिवाई’ बस सेवा नागरिकांसाठी दर्जेदार सेवा, पर्यावरण संरक्षण आणि शहरातील वाहतुकीचा ताण कमी करण्यास मदत करेल, त्यामुळे ही सेवा जिल्ह्यासाठी मैलाचा दगड ठरणार आहे.