जळगावात धक्कादायक प्रकार! बांभोरी कॉलेज च्या प्राचार्यांकडून माजी कर्मचाऱ्यावर जीवघेणा हल्ला?

जळगावात धक्कादायक प्रकार! बांभोरी कॉलेज च्या प्राचार्यांकडून माजी कर्मचाऱ्यावर जीवघेणा हल्ला?

जुन्या वादातून रस्त्यातच हाणामारी; पाळधी पोलिसांत तक्रार दाखल

जळगाव(प्रतिनिधी)- तालुक्यातील बांभोरी परिसरात जुना वाद चिघळत थेट मारहाणीपर्यंत पोहोचल्याची धक्कादायक घटना समोर आली आहे. एस.एस.बी.टी. बांभोरी कॉलेजचे प्राचार्य अमोल लांडगे यांनी कॉलेज मधील माजी कर्मचाऱ्यावर कारने धडक देत स्टीलच्या रॉडने हल्ला केल्याची तक्रार पाळधी पोलिसांकडे दाखल झाली आहे.
तक्रारदार स्वप्निल दत्तात्रय निकम (वय ३८, रा. जळगाव) यांनी दिलेल्या माहितीनुसार, ते पूर्वी एस.एस.बी.टी. कॉलेज, बांभोरी येथे नोकरी करत होते. सन २०२४ मध्ये प्राचार्य अमोल लांडगे यांच्याशी वाद झाल्यानंतर त्यांनी नोकरी सोडली होती. मात्र, त्यानंतरही वारंवार धमक्या दिल्या जात असल्याचा आरोप त्यांनी केला आहे.
दरम्यान, १८ मार्च रोजी सायंकाळी सुमारे ५.४५ वाजता, निकम हे पाळधी रोडवरील हॉटेलकडे जात असताना बांभोरी बसस्टँडजवळील टाकरखेडा फाट्याजवळ घटना घडली. तक्रारीनुसार, प्राचार्य अमोल लांडगे (रा. शिवकॉलनी, जळगाव) यांनी त्यांची चारचाकी वाहनाने निकम यांच्या मोटारसायकलला धडक दिली.
यानंतर वाद वाढत गेला आणि लांडगे यांनी गाडीतून उतरून निकम यांना शिवीगाळ करत चापटा-बुक्यांनी मारहाण केल्याचा आरोप आहे. एवढ्यावर न थांबता त्यांनी गाडीतून स्टीलचा रॉड काढून निकम यांच्या डोक्यात प्रहार केला, ज्यात ते जखमी झाले.
घटनेवेळी उपस्थित असलेल्या असिस्टंट प्रोफेसर कुणाल पवार यांनी मध्यस्थी करत भांडण सोडवल्याची माहिती समोर आली आहे. जखमी अवस्थेत निकम यांनी पाळधी पोलीस दूरक्षेत्र गाठले व त्यानंतर वैद्यकीय तपासणीसाठी जिल्हा शासकीय रुग्णालयात उपचार घेतले.

पोलीस तपास सुरू
या प्रकरणी पाळधी पोलिसांकडे तक्रार दाखल करण्यात आली असून, पुढील तपास सुरू असल्याची माहिती मिळत आहे.
जुना वाद, धमक्या आणि अखेर रस्त्यातील हल्ला—या घटनेमुळे परिसरात खळबळ उडाली असून, संबंधितांवर कठोर कारवाईची मागणी नागरिकांतून होत आहे.