PFMS प्रणाली ‘हँग’ झाल्याने जिल्हा परिषदेचे ‘मार्च क्लोजिंग’ रखडले; कोट्यवधींची बिले अडकली

PFMS प्रणाली ‘हँग’ झाल्याने जिल्हा परिषदेचे ‘मार्च क्लोजिंग’ रखडले; कोट्यवधींची बिले अडकली

​तांत्रिक बिघाडामुळे १२६ कोटींच्या देयकांना ब्रेक; ‘स्पर्श’ प्रणाली ठप्प झाल्याने १२ कोटींचा निधी अधांतरी

​जळगाव: आर्थिक वर्ष संपून १० दिवस उलटले तरी जळगाव जिल्हा परिषदेचे आर्थिक कामकाज अद्याप मार्गी लागलेले नाही. केंद्र सरकारच्या पीएफएमएस (PFMS) प्रणालीत आलेल्या तांत्रिक बिघाडामुळे जिल्हा परिषदेचा कोट्यवधींचा निधी अखर्चित राहिला असून, देयके रखडल्याने प्रशासकीय पेच निर्माण झाला आहे.

​बॅंकिंग प्रणालीच्या लोडिंगचा फटका

​३० आणि ३१ मार्च या काळात जिल्हा कोषागारात विविध विभागांची तब्बल २८५ कोटींची बिले दाखल झाली होती. त्यापैकी एकट्या जिल्हा परिषदेची १२६ कोटी रुपयांची ६१ बिले होती. मात्र, पीएफएमएस प्रणालीवर कामाचा ताण वाढल्याने (सर्व्हर हँग झाल्याने) निधी हस्तांतरणाची प्रक्रिया पूर्ण होऊ शकली नाही. १ एप्रिल रोजी बँकांचे अंतर्गत कामकाज असल्याने ही प्रक्रिया पुन्हा लांबणीवर पडली.

​जिवोन्नती अभियानाचे १२ कोटी ‘स्पर्श’मध्ये अडकले

​जिल्हा ग्रामीण विकास यंत्रणेच्या ‘जिवोन्नती अभियाना’चा कारभार केंद्र सरकारच्या ‘स्पर्श’ या नवीन प्रणालीद्वारे चालतो. मात्र, मार्च एंडिंगला ही प्रणाली पूर्णपणे ठप्प झाल्याने सुमारे १२ कोटींचा निधी अडकला आहे. याचा थेट परिणाम खालील बाबींवर झाला आहे:

• ​जिवोन्नती अभियानातील कर्मचाऱ्यांचे पगार.
• ​समुदाय गुंतवणूक आणि फिरता निधी (CIF/RF).
• ​प्रभाग संघ आणि ग्रामसंघांचे खर्च.

​मुदतवाढीच्या निर्णयाकडे लक्ष

​गेल्या वर्षीही अशाच प्रकारची तांत्रिक अडचण आल्याने शासनाने मार्च एंडिंगसाठी मुदतवाढ दिली होती. मात्र, यंदा १० एप्रिल उजाडली तरी अद्याप शासनाकडून मुदतवाढीचे कोणतेही अधिकृत पत्र प्राप्त झालेले नाही. ९ एप्रिल रोजी देखील प्रणाली सुरू न झाल्याने लेखा विभागाचे कामकाज ठप्प आहे.