टीम इंडियाने बसमध्येच खेळली होळी !

दै. बातमीदार । ७ मार्च २०२३ । देशभर होळीचा सण साजरा होत असतांना बॉलीवूड क्षेत्रासह टीम इंडिया देखील होळीच्या रंगात रंगल्याची दिसून आली आहे. मंगळवारी सराव सत्रानंतर नरेंद्र मोदी स्टेडियममधून हॉटेलकडे परतताना भारतीय खेळाडूंनी जोरदार होळीचा आनंदोत्सव साजरा केला. टीममधील सर्वांनी बसमध्येच सेलिब्रेशन सुरूच होते. सलामीवीर शुभमन गिलने याचा व्हिडिओ शेअर केला आहे.

शुभमन गिलने शेअर केलेल्या व्हिडिओमध्ये माजी कर्णधार विराट कोहली गिलच्या मागे डान्स करताना दिसत आहे. त्याच्या मागे कर्णधार रोहित शर्माही दिसला, ज्याने गिलला व्हिडिओ बनवताना पाहून दोघांच्याही अंगावर रंग फेकला. संघाचे उर्वरित खेळाडूही बसमध्येच एकमेकांवर गुलाल उधळताना दिसले.

बसमध्ये होळी खेळल्यानंतर टीम इंडियाच्या खेळाडूंनी हॉटेलमध्येही होळी खेळली. सर्वजण कोरड्या रंगांची होळी खेळताना दिसत होते. ड्रेसिंग रूममध्ये होळी खेळल्यानंतर भारतीय कर्णधार रोहित शर्मा, सूर्यकुमार यादव आणि ईशान किशनचे फोटोही समोर आले आहेत.

भारत आणि ऑस्ट्रेलिया यांच्यातील कसोटी मालिकेतील चौथा कसोटी सामना गुरुवारपासून अहमदाबादच्या नरेंद्र मोदी स्टेडियमवर खेळवला जाणार आहे. दोन्ही संघ स्टेडियममध्ये सराव करत आहेत. मालिकेतील पहिले 2 कसोटी सामने जिंकून भारताने मालिकेत 2-1 अशी आघाडी घेतली आहे. इंदूरमधील शेवटची कसोटी जिंकून ऑस्ट्रेलियाने वर्ल्ड टेस्ट चॅम्पियनशिपच्या अंतिम फेरीत धडक मारली होती.